Russia Ukraine war: ఉక్రెయిన్పై రష్యన్ సేనలు క్షిపణులు, బాంబులతో భీకర దాడులకు పాల్పడుతున్నాయి. ఇప్పటికే పలు నగరాలను తమ అధీనంలోకి తెచ్చుకున్నాయి. తాజాగా మరోమారు అమెరికా అధ్యక్షుడు జో బైడెన్తో ఫోన్లో మాట్లాడారు ఉక్రెయిన్ అధ్యక్షుడు వొలొదిమిర్ జెలెన్స్కీ. ఉక్రెయిన్కు రక్షణ, ఆర్థిక సాయం వంటి కీలక అంశాలపై చర్చించారు. యుద్ధం మొదలైన తర్వాత బైడెన్తో.. జెలెన్స్కీ ఫోన్లో మాట్లాడటం ఇది రెండోసారి.
'అమెరికా అధ్యక్షుడితో మరోమారు మాట్లాడాను. ఉక్రెయిన్కు రక్షణ, ఆర్థిక సాయం, రష్యాపై ఆంక్షల కొనసాగింపు వంటి కీలక అంశాలు చర్చల అజెండాలో ఉన్నాయి.'
-వొలొదిమిర్ జెలెన్స్కీ, ఉక్రెయిన్ అధ్యక్షుడు
మరోవైపు.. ఇరు దేశాల అధ్యక్షుల మధ్య అర్ధగంట పాటు చర్చలు జరిగినట్లు శ్వేతసౌధం ప్రకటించింది.
బ్లింకెన్తో ఉక్రెయిన్ విదేశాంగ మంత్రి భేటీ
రష్యా భీకర దాడులకు పాల్పడుతున్న తరుణంలో అమెరికా విదేశాంగ మంత్రి ఆంటోని బ్లింకెన్తో పొలండ్ సరిహద్దులో భేటీ అయ్యారు ఉక్రెయిన్ విదేశాంగ శాఖ మంత్రి దిమిత్రో కులేబా. రష్యాపై ఆంక్షలు, కీవ్ రక్షణ సామర్థ్యం పెంపు వంటి అంశాలపై చర్చించారు. 'ఉక్రెయిన్- పొలిస్ సరిహద్దులో యూఎస్ విదేశాంగ మంత్రి బ్లింకెన్ను కలిశాను. ఉక్రెయిన్కు అవసరమైన ఆయుధాలను అందించటం, రష్యాపై మరిన్ని కఠిన ఆంక్షలు విధించి, ఒత్తిడి పెంచే మార్గాలపై చర్చించాం.' అని ట్వీట్ చేశారు కులేబా. ఈ చర్చలు ఫలప్రదంగా ముగిశాయని, రష్యాపై విధించిన ఆంక్షలను కఠినతరం చేయటంపై ఇరుదేశాలు సమ్మతించాయన్నారు.
ఉక్రెయిన్ ప్రజలకు అమెరికాతో పాటు యావత్ ప్రపంచం అండగా ఉంటుందని భరోసా కల్పించారు బ్లింకెన్. అమెరికా, దాని భాగస్వామ్య దేశాలు రష్యాపై ఒత్తిడి తెచ్చేందుకు అన్ని చర్యలు తీసుకుంటున్నట్లు చెప్పారు.
రష్యా చేతిలో బందీగా 4 లక్షల మంది ఉక్రెనియన్లు
మేరియుపొల్లోని పౌరులను తరలించేందుకు కాల్పుల విరమణ ప్రకటించిన రష్యా మాట తప్పిందని ఆరోపించారు ఆ నగర మేయర్ వదిమ్ బాయ్చెంకో. నగరాన్ని రష్యా నిర్బంధించి.. మానవతా కారిడార్కు నిరాకరించినట్లు చెప్పారు. ఇప్పటికే నగరంలో నీరు, విద్యుత్తు సౌకర్యం లేదని ఆందోళన వ్యక్తం చేశారు. రష్యా బలగాల చేతిలో సుమారు 4 లక్షల మంది నగరవాసులు బందీగా ఉన్నారని తెలిపారు.
ఉక్రెయిన్- రష్యా మధ్య మూడో దఫా చర్చలు
ఉక్రెయిన్- రష్యా మధ్య శాంతి చర్చలు జరుగుతున్నా ఎలాంటి ఫలితం లభించటం లేదు. ఈ క్రమంలోనే మరో దఫా చర్చలకు ఇరు దేశాలు సిద్ధమయ్యాయి. మూడో విడత చర్చలు సోమవారం (మార్చి 8న) జరగనున్నాయని ఉక్రెయిన్ చర్చల బృంద సభ్యుడు డేవిడ్ అరఖమియా తెలిపారు. కాల్పుల విరమణ, పౌరులను సురక్షితంగా తరలించే అంశం ప్రధానంగా ఈ చర్చలు జరగనున్నాయని తెలిపారు.
పుతిన్తో ఇజ్రాయెల్ ప్రధాని భేటీ..
ఉక్రెయిన్పై రష్యా దాడుల నేపథ్యంలో అధ్యక్షుడు పుతిన్తో భేటీ అయ్యారు ఇజ్రాయెల్ ప్రధాని నెఫ్తాలీ బెన్నెట్. ఉక్రెయిన్తో చర్చలు చేపట్టాలని కోరినట్లు అంతర్జాతీయ మీడియా పేర్కొంది. కీవ్, మాస్కోలతో ఇజ్రాయెల్కు మంచి సంబంధాలు ఉన్న నేపథ్యంలో.. చర్చల దిశగా రష్యాతో చర్చలు చేపట్టాలని ఆ దేశాన్ని కోరింది ఉక్రెయిన్.
మూడో అణు కేంద్రం దిశగా రష్యన్ సేనలు
ఉక్రెయిన్లోని రెండు అణు విద్యుత్తు కేంద్రాలను తమ అధీనంలోకి తీసుకున్న రష్యన్ సేనలు.. మూడో న్యూక్లియర్ ప్లాంట్ దిశగా వేగంగా కదులుతున్నాయని అమెరికా సెనేటర్లతో అధ్యక్షుడు వొలొదిమిర్ జెలెన్స్కీ చెప్పారు. మైకోలేవ్కు 120 కిలోమీటర్ల దూరంలో ఉన్న యుజ్నౌక్రైన్స్ అణు కేంద్రానికి ముప్పు పొంచి ఉందని ఆందోళన వ్యక్తం చేశారు. ఇప్పటికే జపోరిజియా, చెర్నోబిల్ అణు విద్యుత్తు కేంద్రాలను తమ అధీనంలోకి తీసుకున్నాయి రష్యన్ దళాలు.
కొనసాగుతున్న ఆంక్షలు..
ఉక్రెయిన్పై భీకర దాడులకు పాల్పడుతున్న రష్యాపై ఆంక్షల పర్వం కొనసాగుతోంది. తాజాగా ఆ దేశంలో కార్యకలాపాలను నిలిపివేస్తున్నట్లు ప్రకటించాయి వీసా, మాస్టర్కార్డ్. రానున్న రోజుల్లో పూర్తిస్థాయిలో తమ సేవలను ఆపేస్తామని ప్రకటించాయని ఉక్రెయిన్ మీడియా తెలిపింది. మరోవైపు.. రష్యాలోని అన్ని స్టోర్లలో కార్యకలాపాలను నిలిపివేస్తున్నట్లు పూమా తెలిపింది. ఇప్పటికే రష్యాకు సరఫరా ఆగిపోయినట్లు పేర్కొంది.
ఇదీ చూడండి:
