భారత సంతతికి చెందిన రాజకీయ నేత రుషి సనక్ బ్రిటన్ ఆర్థిక మంత్రిగా నియమితులయ్యారు. మంత్రివర్గ పునర్వ్యవస్థీకరణలో భాగంగా బ్రిటన్ ప్రధాని బోరిస్ జాన్సన్.. రుషికి చోటు కల్పించారు. బ్రిటన్ హోంమంత్రి ప్రీతి పటేల్ తర్వాత ఈ ఘనత సాధించిన వ్యక్తి రుషి సనక్.
బ్రిటన్ ప్రభుత్వంలో రెండో అతిపెద్ద పదవిని దక్కించుకున్న రుషి.. ఇన్ఫోసిస్ సహవ్యవస్థాపకుడు నారాయణమూర్తి అల్లుడు కావటం విశేషం.
"ఆర్థిక మంత్రిగా రుషి సనక్ నియామకాన్ని సంతోషంగా ఆమోదించారు బ్రిటన్ రాణి ఎలిజబెత్-2."
- బ్రిటన్ ప్రభుత్వ ప్రకటన
2019 డిసెంబర్ ఎన్నికల్లో బోరిస్ భారీ విజయం తర్వాత ఆర్థిక మంత్రిగా ఉన్న పాక్ సంతతికి చెందిన సాజిద్ జావిద్ రాజీనామా చేశారు. ఆ స్థానంలో కోశాగార ప్రధాన కార్యదర్శిగా వ్యవహరించిన రుషిని ఎంపిక చేశారు బోరిస్.
వేగంగా ఎదుగుదల..
కన్జర్వేటివ్ పార్టీకి చెందిన రుషి.. బ్రిటన్ పార్లమెంటుకు 2015లో మొదటిసారి ఎన్నికయ్యారు. బ్రెగ్జిట్ విషయంలో బోరిస్ వ్యూహానికి మద్దతుగా నిలిచి.. వేగంగా రాజకీయాల్లో ఎదిగారు. బ్రిటన్లో పుట్టిన రుషి సనక్.. ఇన్ఫోసిస్ నారాయణమూర్తి కుమార్తె అక్షతను వివాహం చేసుకున్నారు.
మరి కొంతమందికి..!
బ్రిటన్లో మరి కొంతమంది మంత్రులు రాజీనామాలు చేయనున్నారనే వార్తలు వస్తున్నాయి. ఈ నేపథ్యంలో భారత సంతతి ఎంపీలు ఆలోక్ వర్మ, సువెల్లా బ్రేవర్మ్యాన్ తదితరులు కేబినెట్లో చోటు కోసం ప్రయత్నిస్తున్నారు.
