భారత్లో కరోనా రెండోదశ కొనసాగుతున్న వేళ ప్రపంచదేశాలు అండగా నిలుస్తున్నాయి. తాజాగా అదనపు అత్యవసర వైద్య పరికరాలు సరఫరా చేయనున్నట్లు ఐరోపా సమాఖ్య(ఈయూ) ప్రకటించింది. స్పెయిన్, డెన్మార్క్, నెదర్లాండ్స్ దేశాలు సైతం భారత్కు సాయం చేయడానికి ముందుకొచ్చాయి.
దీనిలో భాగంగా స్పెయిన్.. 119 ఆక్సిజన్ కాన్సంట్రేటర్లు, 145 వెంటిలేటర్లు సరఫరా చేయనుండగా.. డెన్మార్క్ 53 వెంటిలేటర్లు పంపుతోంది. నెదర్లాండ్స్ 100 ఆక్సిజన్ కాన్సంట్రేటర్లు, 30 వేల యాంటీవైరల్ ఔషధాలు, రెమ్డెసివిర్తో పాటు.. 449 వెంటిలేటర్లు భారత్కు అందిస్తున్నట్లు ఈయూ తెలిపింది. అలాగే 15 వేల యాంటీవైరస్ డ్రగ్స్తో పాటు 516 వెంటిలేటర్లను జర్మనీ.. భారత్కు పంపిస్తున్నట్లు పేర్కొంది.
ఈ విపత్కర సమయంలో మిత్ర దేశమైన భారత్కు సాయం చేస్తున్నందుకు తాము గర్వపడుతున్నట్లు ఈయూ తెలిపింది. కరోనాతో పోరులో విజయం సాధించాలంటే సమష్టి కృషి అవసరమని పేర్కొంది.
కాగా, కువైట్ నుంచి 282 ఆక్సిజన్ సిలిండర్లు, 60 ఆక్సిజన్ కాన్సంట్రేటర్లు, వెంటిలేటర్లు, ఇతర వైద్య పరికరాలు భారత్కు చేరుకున్నాయి. ఈ సందర్భంగా కువైట్కు ధన్యవాదాలు తెలిపింది భారత విదేశాంగ శాఖ.
మరోవైపు, ఇజ్రాయెల్ సైతం భారత్కు.. వైద్య సాయాన్ని అందించేందుకు ముందుకొచ్చింది. ఆక్సిజన్ జనరేటర్లు, రెస్పిరేటర్లు పంపనున్నట్లు ఆ దేశ విదేశాంగ శాఖ తెలిపింది. వారం రోజుల వ్యవధిలో భారత్కు చేరుకునే వివిధ విమానాల్లో వీటిని పంపనున్నట్లు స్పష్టం చేసింది.
ఇప్పటికే ఐరోపా దేశాలైన ఐర్లాండ్, బెల్జియం, రొమేనియా, లగ్జంబర్గ్, పోర్చుగల్, స్వీడన్, ఫ్రాన్స్, ఇటలీ, ఆస్ట్రియాలు భారత్కు తమ వంతు సాయాన్ని అందించాయి.
ఇదీ చూడండి: పేద దేశాలకు 50 కోట్ల మోడెర్నా టీకా డోసులు!
