లాక్డౌన్లతో కట్టుదిట్టం చేసినా ప్రపంచవ్యాప్తంగా కరోనా వైరస్ అంతకంతకూ విస్తరిస్తోంది. భారత్, దక్షిణాఫ్రికా, మెక్సికో దేశాల్లో పెరుగుదల చూస్తే ఈ మహమ్మారికి అంతం దగ్గరలో లేదని స్పష్టంగా అర్థమవుతోంది!
అయినప్పటికీ చాలా దేశాలు లాక్డౌన్లు సడలింపులు ఇస్తున్నాయి. ఆర్థిక కార్యకలాపాలకు అనుమతిస్తున్నాయి. అవసరమైన జాగ్రత్తలు తీసుకుంటూనే కర్మాగారాలకు అనుతులు ఇస్తున్నారు. అయినప్పటికీ కరోనా విజృంభిస్తూనే ఉంది. ఇప్పటివరకు ప్రపంచవ్యాప్తంగా 49.33 లక్షలకు పైగా కేసులు నమోదయ్యాయి. 3.21 లక్షల మంది మరణించారు.
కరోనా బాధిత దేశాల జాబితాలో.. పశ్చిమ ఐరోపా దేశాలను దాటి కొత్తగా రష్యా, బ్రెజిల్ ముందుకు దూసుకొచ్చాయి. అమెరికా తర్వాత ఈ రెండు దేశాలు నిలవటం కొవిడ్ తీవ్రతను తెలియజేస్తోంది. రష్యాలో కొత్త కేసులతో పాటు హాట్స్పాట్లు క్రమంగా పెరుగుతున్నాయి. అమెరికా తర్వాత రష్యాలోనే కేసుల తీవ్రత అధికంగా ఉంది. అమెరికాలో 15 లక్షలకు పైగా కేసులు నమోదు కాగా.. ఇప్పటివరకు 92 వేల మంది మరణించారు.
రెండో స్థానానికి రష్యా..
రష్యాలో గడిచిన 24 గంటల్లో 9,263 కేసులు నమోదయ్యాయి. వీటితో కలిపి దేశంలో మొత్తం కేసుల సంఖ్య 3 లక్షలకు చేరువైంది. వీటిలో సగం కేసులు రాజధాని మాస్కోలోనే నమోదయ్యాయి. ఇప్పటికి 2,837 మంది మృత్యువాత పడ్డారు.
రష్యాలోని రెండో అతిపెద్ద నగరం సెయింట్ పీటర్స్బర్గ్లోనూ భారీగా కేసులు నమోదవుతున్నాయి. ఇక్కడ ఏ కారణంతో మరణించినా.. శవపేటికల్లోనే మృతదేహాలను తరలిస్తున్నారు.
లాటిన్ అమెరికాలో..
లాటిన్ అమెరికా దేశాల్లోనూ వైరస్ ప్రభావం భారీగానే ఉంది. ఇప్పటివరకు 4.83 లక్షల కేసులు నమోదు కాగా.. 30 వేల మందికిపైగా మరణించారు. ఈ దేశాల్లో 2.5 లక్షల కేసులతో బ్రెజిల్ మొదటిస్థానంలో ఉంది. రియోడీజనిరో, సావో పాలో రాష్ట్రాల్లోని ఇంటెన్సివ్ కేర్ యూనిట్లు ఇప్పటికే 85 శాతం నిండిపోయినట్లు అధికారులు చెబుతున్నారు.
ఆసియాలోనూ..
భారత్లోనూ కేసుల సంఖ్య లక్ష దాటింది. బంగ్లాదేశ్, పాకిస్థాన్ దేశాల్లోనూ కేసుల సంఖ్య క్రమంగా పెరుగుతున్నాయి. కరోనా ప్రభావం తగ్గిన మరికొన్ని దేశాల్లో మళ్లీ కేసులు రావడం ఆందోళన కలిగిస్తోంది. ఇరాన్లో ఏప్రిల్లో కేసులు తగ్గినా.. మే నెలలో మళ్లీ విజృంభిస్తున్నాయి.
ఆర్థికంగా ప్రభావం..
కరోనా ప్రభావంతో ఆర్థిక వ్యవస్థలపైనా భారీగా ప్రభావం పడుతోంది. బ్రిటన్, అమెరికా వంటి దేశాల్లో నిరుద్యోగ సమస్య తీవ్రమవుతోంది. అయితే కరోనా వ్యాక్సిన్ ప్రయోగాల్లో ఆశించిన ఫలితాలు రావటం అందరిలోనూ ఆశలు రేకెత్తిస్తోంది. ఈ ఫలితాలకు సంబంధించిన వార్తలు రాగానే స్టాక్ మార్కెట్లు భారీగా లాభపడ్డాయి.
