బ్రిటన్ పార్లమెంటు సమావేశాలను అక్టోబర్ 14 వరకు రద్దు చేయాలన్న ప్రధానమంత్రి బోరిస్ జాన్సన్ వినతికి ఎలిజబెత్ రాణి-2 ఆమోదం తెలిపారు. ఐరోపా సమాఖ్య నుంచి వైదొలిగేందుకు అక్టోబర్ 31 వరకు తుది గడువు ఉంది. ఈ మేరకు సరికొత్త శాసన అజెండాను రూపొందించేందుకు వీలుగా సమావేశాలను తాత్కాలికంగా వాయిదా వేయాలని జాన్సన్ నిర్ణయించారు.
బోరిస్ నిర్ణయంపై విపక్షాల నుంచి తీవ్ర విమర్శలు ఎదురయ్యాయి. బ్రెగ్జిట్పై చర్చ చేపట్టకుండా నిలువరించేందుకు ఈ నిర్ణయం తీసుకున్నారని హౌస్ ఆఫ్ కామన్స్ స్పీకర్ జాన్ బెర్కో దుయ్యబట్టారు. ఇది రాజ్యాంగపరమైన దౌర్జన్యమని ఆగ్రహం వ్యక్తం చేశారు.
ఎందుకీ పరిణామం
అక్టోబర్ 14 వరకు సమావేశాల రద్దు ద్వారా ఎంపీలు ఎటువంటి ముఖ్యమైన చట్టాలపై చర్చించేందుకు అవకాశం ఉండదు. బ్రెగ్జిట్పై ప్రతిపక్షం ఎలాంటి అడ్డుకట్ట వేయకుండా ఈ పరిణామం నిలువరిస్తుంది. బ్రెగ్జిట్ తర్వాత బ్రిటన్ పయనంపై కొత్త సర్కారు నిర్ణయం తీసుకునేందుకు ఇది సరైన సమయమని ప్రభుత్వ వర్గాల సమాచారం.
ఇదీ చూడండి: బ్రెగ్జిట్ కోసమే యూకే పార్లమెంటు రద్దు..!
