ఓ ఇల్లును సొంతం చేసుకోవాలంటే రూ.లక్షలు, రూ.కోట్లతో కూడుకున్న పని. అయితే.. క్రొయేషియాలోని లెగ్రాడ్ పట్టణం బంపర్ ఆఫర్ ప్రకటించింది. తమ పట్టణంలో కేవలం 1 కునా (రూ.12)కే ఇల్లు విక్రయిస్తామని ప్రకటన చేసింది.
ఎందుకు అంత చౌక?
ఈ ఆఫర్ను ప్రకటించడానికి బలమైన కారణం లేకపోలేదు. శతాబ్దం క్రితం ఆస్ట్రో-హంగేరియన్ సామ్రాజ్యం విచ్ఛిన్నం కావడం వల్ల లెగ్రాడ్‌లో జనాభా గణనీయంగా తగ్గిపోతూ వస్తోంది. చాలామంది గృహాలను వదిలేసి వెళ్లిపోయారు. దీంతో ఆ గృహాలను కేవలం 1 కునా (రూ.12)కే విక్రయించాలని ఆ పట్టణ పురపాలక శాఖ నిర్ణయం తీసుకుంది. కొత్త నివాసితులను ఆకర్షించేందుకు ఈ ఆఫర్ ప్రకటించింది.
కండీషన్స్ అప్లై..
హంగేరి సరిహద్దుకు సమీపంలో ఉన్న ఈ పట్టణంలో ప్రస్తుతం 2 వేల 250 మంది నివాసితులు ఉన్నారు. ఇల్లు కొనాలనుకునే వారికి కొన్ని నిబంధనలు పెట్టింది. 45 ఏళ్ల లోపు ఉండి ఆర్థికంగా బలంగా ఉన్నవారు 15 ఏళ్ల పాటు ఉంటామని హామీనిస్తే ఇళ్లను విక్రయిస్తోంది.
ఆఫర్కు స్పందన..
లెగ్రాడ్ పట్టణం ప్రకటించిన ఆఫర్కు విదేశాల నుంచి కూడా మంచి స్పందనే వచ్చింది. ఇప్పటివరకు 19 ఇళ్లను అధికారులు విక్రయించారు. రష్యా, ఉక్రెయిన్, టర్కీ, అర్జెంటీనా దేశస్థులు కూడా ఇక్కడ ఇళ్లను కొన్నారు. ఇళ్లు కొన్నవారికి ఉపాధి అవకాశాలను కూడా కల్పిస్తున్నారు.
ఇదీ చదవండి : కరెన్సీ కట్టలతో పబ్ అలంకరణ!
