'రష్యా టీకాతో వలంటీర్లలో ఇన్ఫెక్షన్లు'

రష్యా టీకాతో వలంటీర్లలో ఇన్ఫెక్షన్లు కనిపించాయని అక్కడి వార్తా సంస్థ పేర్కొంది. టీకా తయారీలో పాల్గొన్న ఉన్నతాధికారి ఈ విషయాన్ని వెల్లడించినట్లు తెలిపింది. అయితే.. అసలైన టీకా కాకుండా ప్లాసిబో తీసుకున్నవారిలోనే లక్షణాలు కనిపించి ఉండొచ్చని టీకా తయారు చేసిన గమలేయ జాతీయ పరిశోధన సంస్థ డైరెక్టర్ అభిప్రాయపడ్డారు.

ప్రపంచంలోనే మొట్టమొదటి కరోనా టీకాగా అభివర్ణిస్తూ రష్యా విడుదల చేసిన 'స్పుత్నిక్-వీ' వల్ల ఇన్ఫెక్షన్లు తలెత్తుతున్నాయి. వ్యాక్సిన్ తయారీలో పాల్గొన్న ఉన్నతాధికారి ఈ విషయాన్ని వెల్లడించారని ఆ దేశ వార్తా సంస్థ 'టాస్' తెలిపింది. ఈ నేపథ్యంలో ట్రయల్స్​లో పాల్గొన్న వలంటీర్లలో ఎవరికి అసలైన వ్యాక్సిన్ ఇచ్చామనే విషయంపై గమలేయ సంస్థ సమాచారం క్రోడీకరిస్తోందని వెల్లడించింది.

"టీకాకు అనుమతులు లభించిన తర్వాత నిర్వహించిన పరీక్షల్లో కొందరికి ఇన్ఫెక్షన్లు తలెత్తాయి. నవంబర్​ మధ్యలో తాత్కాలిక ఫలితాలు వెల్లడవుతాయి. ప్లాసిబో, నమూనా పరీక్షల మధ్య వ్యత్యాసం అప్పుడు స్పష్టమవుతుంది."

-రష్యా అధికారి.

ట్రయల్స్ ఫలితాలు వెల్లడైన తర్వాత ఎవరు ప్లాసిబో తీసుకున్నారు, ఎవరు టీకా తీసుకున్నారనే విషయం తెలుస్తుందని గమలేయ జాతీయ పరిశోధన కేంద్రం డిప్యూటీ రీసెర్చి డైరెక్టర్ డెనిస్ లొగునవ్ పేర్కొన్నారు.

మరోవైపు, టీకా కాకుండా ప్లాసిబో తీసుకున్నవారిలోనే ఈ లక్షణాలు కనిపించి ఉంటాయని గమలేయ సంస్థ డైరెక్టర్ అభిప్రాయం వ్యక్తం చేశారు.