బ్రిటన్ ప్రధానిగా కన్సర్వేటివ్ పార్టీ నేత బోరిస్ జాన్సన్ ఎన్నికయ్యారు. త్వరలో అధికార పగ్గాలు చేపట్టనున్నారు. ఐరోపా సమాఖ్య నుంచి విడిపోయే బ్రెగ్జిట్ బిల్లు కీలక దశలో ఉన్న నేపథ్యంలో... దేశంలోని సంక్లిష్ట రాజకీయ పరిస్థితుల్ని చక్కదిద్దడం జాన్సన్ ముందున్న ప్రధాన సవాలు.
అంతర్గతంగా...
బ్రెగ్జిట్ సంక్షోభంతో ప్రధాని పదవి నుంచి థెరిసా మే తప్పుకోవడం అనివార్యమైంది. ఫలితంగా కన్సర్వేటివ్ పార్టీ పార్లమెంటరీ పక్షనేతగా కొత్త వ్యక్తిని ఎన్నుకోవాల్సి వచ్చింది. పార్టీ సభ్యులంతా ఓటు వేసిన ఈ ఎన్నికల్లో విదేశాంగ మంత్రిగా, లండన్ మేయర్గా గతంలో పనిచేసిన బోరిస్ జాన్సన్కు, మాజీ విదేశాంగ మంత్రి జెరెమీ హంట్ మధ్య ప్రధానంగా పోటీ నడిచింది. చివరకు జాన్సన్ను విజయం వరించింది.
మెజారిటీ విజయం
బోరిస్ జాన్సన్కు 92, 153 ఓట్లు రాగా... జెరెమీ హంట్ 46, 656 ఓట్లు సాధించారు. 509 ఓట్లు చెల్లలేదు.
బుధవారం తర్వాతే ప్రమాణస్వీకారం
ప్రస్తుత ప్రధాని థెరిసా మే బుధవారం ప్రధానిగా రాజీనామా చేసే అవకాశం ఉంది. నూతన కేబినెట్పై జాన్సన్ త్వరలో నిర్ణయం తీసుకుంటారని సమాచారం.
భారత సంతతి ఎంపీలకు కేబినెట్లో స్థానం!
భారత సంతతికి చెందిన ఎంపీలు ప్రీతి పటేల్, రిషి సునక్లకు జాన్సన్ కేబినెట్లో చోటు దక్కే అవకాశం ఉంది.
"కన్సర్వేటివ్ పార్టీ నేతగా, ప్రధానిగా బోరిస్ జాన్సన్ నూతన ప్రణాళికలతో దేశాన్ని ముందుకు తీసుకెళతారని బ్రిటన్ ప్రజల్లో విశ్వాసం ఉంది. భారత్ సహా మిత్రదేశాలతో సంబంధాలను జాన్సన్ పునరుద్ధరిస్తారని నమ్మకం ఉంది."
-ప్రీతి పటేల్, ఎంపీ
ఇదీ చూడండి: 'ట్రంప్ వ్యాఖ్యలపై మోదీ వివరణ ఇవ్వాల్సిందే'
