అమెరికా విదేశాంగ మంత్రి ఆంటోనీ బ్లింకన్.. రష్యా విదేశాంగ మంత్రి సెర్గీ లవ్రోవ్తో బుధవారం తొలిసారిగా భేటీ కానున్నారు. ఐస్లాండ్లో జరుతున్న ఆర్కిటిక్ కౌన్సిల్ మినిస్టెరియల్ మీటింగ్ సందర్భంగా ఈ భేటీ జరగనున్నట్లు తెలుస్తోంది. ఈ భేటీ.. రష్యాతో సత్సంబంధాలు నెలకొల్పేందుకు అవకాశంగా భావిస్తున్నామని అమెరికా విదేశాంగ శాఖ తన ప్రకటనలో పేర్కొంది. రష్యాతో అమెరికా సంబంధాలు అంతంత మాత్రంగానే ఉన్న నేపథ్యంలో బ్లింకన్ - లవ్రోవ్ల భేటీ ప్రాధాన్యం సంతరించుకుంది.
ఈ భేటీలో సత్సంబంధాలతో పాటు అంతర్జాతీయ ఎజెండాపై ఇరు దేశాలు చర్చించనున్నట్లు తెలుస్తోంది. అమెరికా అధ్యక్షుడు బైడెన్, రష్యా అధ్యక్షుడు వ్లాదిమిర్ పుతిన్ల భేటీపై కూడా మంత్రులు చర్చించే అవకాశం ఉందని సమాచారం.
రష్యా అధ్యక్షుడితో ఇతర దేశాల్లో జరిగే సదస్సు సందర్భంగా భేటీ అయ్యేందుకు సిద్ధంగా ఉన్నానని అధ్యక్షుడు బైడెన్ ఇటీవల పేర్కొన్నారు. అయితే బైడెన్ ఆహ్వానాన్ని పుతిన్ స్వాగతిస్తారా లేదా అనే విషయంపై స్పష్టత లేదు.
ఇదీ చదవండి : 'భారత్ వేరియంట్పై అమెరికా టీకాలు భేష్'
