రాబోయే కాలంలో మరింత అప్రమత్తంగా వ్యవహరించాలని ప్రపంచ దేశాలకు హితవు పలికింది ప్రపంచ ఆరోగ్య సంస్థ. లేదంటే రెండోసారి మహమ్మారి విజృంభణకు సిద్ధంగా ఉండాల్సిన అవసరం ఏర్పడొచ్చని హెచ్చరించింది.
కరోనా వైరస్ ఓ వైపు విజృంభిస్తోన్నా ఆర్థిక కార్యకలాపాల పునరుద్ధరణకు ప్రపంచ దేశాలు సిద్ధమవుతున్నాయి. ఫ్రాన్స్, బెల్జియం లాక్డౌన్లను ఎత్తివేశాయి. నెదర్లాండ్స్ పాఠశాలలను ప్రారంభించగా.. అమెరికా వాణిజ్యంపై ఆంక్షలు సడలించటంలో ముందు వరుసలో ఉంది. ఈ నేపథ్యంలో తాజా హెచ్చరికలు చేసిన డబ్ల్యూహెచ్ఓ.
మళ్లీ విజృంభణ..
విస్తృత స్థాయిలో పరీక్షలు, కాంటాక్ట్ ట్రేసింగ్ చేపట్టకుండా సాధారణ కార్యకలాపాలకు అనుమతి ఇస్తే వైరస్ మరింత విజృంభించే అవకాశాలు ఉన్నాయని ఇప్పటికే నిపుణులు హెచ్చరిస్తున్నారు. ఆంక్షల ఎత్తివేత తర్వాత జర్మనీ, చైనాలోని వుహాన్ నగరం, దక్షిణ కొరియాలో కేసుల పెరుగుదుల ఈ విషయాన్ని స్పష్టం చేస్తుంది.
గుడ్డిగా వెళితే ఎలా..
ఈ నేపథ్యంలో ప్రపంచ ఆరోగ్య సంస్థ అత్యవసర విభాగం చీఫ్ డాక్టర్ మైఖేల్ ర్యాన్ ప్రపంచ దేశాలను హెచ్చరించారు. వైరస్ కాంటాక్ట్ ట్రేసింగ్కు సంబంధించి పటిష్ఠ చర్యలు తీసుకోవాలని సూచించారు.
"జర్మనీ, దక్షిణ కొరియా దేశాలు కాంట్రాక్ట్ ట్రేసింగ్లో అవలంబించిన చర్యలు నమ్మకాన్ని కలిగించాయి. వైరస్ క్లస్టర్లను ముందే గుర్తించి వ్యాప్తిని అడ్డుకున్నాయి. కానీ కొన్ని దేశాలు లాక్డౌన్లో ఉన్నప్పటికీ సరైన కాంటాక్ట్ ట్రేసింగ్ చర్యలు చేపట్టలేదు. బాధితులతో సన్నిహితంగా ఉన్నవారిని గుర్తించి వారు వైరస్ను వ్యాప్తి చేయకముందే క్వారంటైన్లో ఉంచాల్సిన అవసరం ఉంది."
- మైఖేల్ ర్యాన్
పేర్లను ప్రస్తావించకుండా కొన్ని దేశాలను, ముఖ్యంగా అమెరికాను ఉద్దేశించి గుడ్డిగా వ్యవహరిస్తున్నాయని మండిపడ్డారు ర్యాన్. వైరస్ విజృంభిస్తోన్నా తాము విజయం సాధించామన్న భ్రమలో ఉన్నారని విమర్శించారు. వైరస్ మరింత విజృంభించే అవకాశం ఉందని ర్యాన్ హెచ్చరించారు.
ఇదీ చూడండి: చైనాతో రెండోదశ వాణిజ్య చర్చలకు ట్రంప్ నో!
