రష్యా ఆమోదం తెలిపిన 'స్పుత్నిక్- వీ' కరోనా వ్యాక్సిన్ మూడో దశ పరిశోధన మరో 7-10 రోజుల్లో ప్రారంభం కానుందని ఓ నివేదిక తెలిపింది. స్థానిక వార్తా సంస్థ ప్రకారం... గమలేయా శాస్త్రీయ పరిశోధనా సంస్థ చేపట్టే ఈ ప్రయోగం మాస్కో ప్రాంతంలో జరుగనుంది. ఇందులో వేలాది మంది వాలంటీర్లు పాల్గొననున్నారు.
"మా సంస్థ తయారు చేసిన వ్యాక్సిన్కు ప్రపంచవ్యాప్తంగా భారీ స్పందన వచ్చింది. కానీ, ప్రొటోకాల్ ప్రకారం అన్ని పరిశోధనలు పూర్తి చేయాలి. ఆరోగ్య మంత్రిత్వ శాఖ ఎలాంటి ఆలస్యం లేకుండా తదుపరి, చివరి ప్రయోగానికి అనుమతులిస్తుందని ఆశిస్తున్నాం. వారం, పది రోజుల్లో ఈ ప్రక్రియ మొదలవుతుంది. "
-గింట్స్ బర్గ్, గమలేయా సంస్థ డైరెక్టర్.
మూడో దశ పరీక్షలు నిర్వహించకుండానే.. వ్యాక్సిన్ ఉత్పత్తిని ప్రారంభించింది రష్యా. పైగా ముందు రష్యా పౌరులకు వ్యాక్సిన్ అందాకే, ఇతర దేశాలకు ఇస్తామని ప్రకటించింది. అయితే స్పుత్నిక్- వీ వ్యాక్సిన్ ఎంతవరకు సురక్షితం అని తేలేది మాత్రం మూడో దశ ఫలితాలు వచ్చాకేనని నిపుణులు చెబుతున్నారు.
ఇదీ చదవండి: కరోనా వ్యాక్సిన్ ఉత్పత్తిని ప్రారంభించిన రష్యా!
