మయన్మార్లో కొవిడ్ వ్యాప్తి పెరుగుతున్న నేపథ్యంలో ఆకలి సంక్షోభం సమస్య తలెత్తుతోందని అమెరికాకు చెందిన వరల్డ్ ఫుడ్ ప్రోగ్రామ్(WFP) వెల్లడించింది. నిరుద్యోగం, ఆహార, చమురు ధరల పెంపు, రాజకీయ అశాంతి, హింస మొదలైనవి ఆహార సమస్యకు కారణమవుతున్నాయని హెచ్చరించింది.
" నిధుల కొరత వల్ల మయన్మార్లో.. పలు భవిష్యత్తు కార్యక్రమాలు నిలిచిపోయాయి. ఫలితంగా వచ్చే ఆరు నెలల్లో ఆకలి సమస్యను ఎదుర్కొంటున్న వారి సంఖ్య రెట్టింపు అవుతుంది. దాదాపు 6.2 మిలియన్ల మంది ఆహార సమస్య ఊబిలో చిక్కుకోనున్నారు" అని డబ్ల్యూఎఫ్పీ హెచ్చరించింది.
ఇప్పటికే మయన్మార్లో ఆకలి సమస్య తీవ్రమైందని డబ్ల్యూఎఫ్పీ మయన్మార్ డైరెక్టర్ స్టీఫెన్ అండర్సన్ తెలిపారు. యాంగూన్ సమీపంలోని మురికివాడల్లో నివసిస్తున్న 90 శాతం మంది ఆహారం కోసం డబ్బులు లేక ఇబ్బంది పడుతున్నారని పేర్కొన్నారు. ఆదాయం లేక చాలా మంది ఇబ్బందులు పడుతున్నట్లు స్పష్టం చేశారు.
"మయన్మార్ సైనిక ప్రభుత్వ హింసకాండకు భయపడి దాదాపు 2,20,000 మంది పారిపోయారు. అనంతరం తీవ్ర ఇబ్బందులు ఎదుర్కొంటున్నారు. ఇందులో 17,500 మందికి డబ్ల్యూఎఫ్పీ సాయం చేసింది. ఆగస్టులో మరింత మందికి సాయం అందించేందుకు ప్రణాళిక రచిస్తోంది. మొత్తంగా 2021లో.. 1.25 మిలియన్ల మందికి డబ్ల్బూఎఫ్పీ ఆహారం, నిధి సహాయం అందింది" అని అమెరికా సంస్థ పేర్కొంది.
ఇదీ చదవండి:'మరో రెండేళ్ల పాటు నేనే ప్రధాని'
