ప్రపంచవ్యాప్తంగా కరోనా కేసుల సంఖ్య కోటికి చేరువైంది. రోజుకు వేల సంఖ్యలో నమోదవుతున్న కేసులతో పలు దేశాలు విలవిల్లాడుతున్నాయి. ఇప్పటి వరకు మరణించిన వారి సంఖ్య దాదాపు 5 లక్షలకు చేరువైంది. కేసులు, మరణాల పరంగా అమెరికా అగ్రస్థానంలో కొనసాగుతోంది. కేసుల పరంగా బ్రెజిల్, రష్యా, భారత్, బ్రిటన్లు ఆ తర్వాతి స్థానాల్లో ఉన్నాయి.
అమెరికాలోని పెద్ద రాష్ట్రాలైన టెక్సాస్, ఫ్లోరిడాలో మళ్లీ ఆంక్షలు విధించాయి స్థానిక ప్రభుత్వాలు. దేశవ్యాప్తంగా ఒక్క రోజులోనే 40వేలకు పైగా కేసులు నమోదైన నేపథ్యంలో.. బార్లు తెరిచి ఉంచడమే కేసుల పెరుగుదలకు కారణంగా పేర్కొంటూ వాటిని మూసివేశారు.
చైనా, దక్షిణ కోరియాలో మళ్లీ విజృంభణ..
వైరస్కు పుట్టినిల్లు చైనాలో కొవిడ్-19 మళ్లీ విజృంభిస్తోంది. శనివారం ఒక్క రోజే 21 కొత్త కేసులు నమోదైనట్లు ఆ దేశ జాతీయ ఆరోగ్య కమిషన్ వెల్లడించింది. అందులో 17 రాజధాని బీజింగ్లో ఉన్నట్లు తెలిపింది. హోల్సెల్ ఫుడ్ మార్కెట్లు, పాఠశాలల మూసివేశారు. పలు ప్రాంతాల్లో లాక్డౌన్ విధించారు అధికారులు.
వైరస్ కట్టడిలో విజయవంతమైనట్లు ప్రకటించుకున్న దక్షిణ కొరియాలో వైరస్ మళ్లీ పంజా విసురుతోంది. శనివారం కొత్తగా 51 కేసులు నమోదయ్యాయి. అందులో 35 రాజధాని సియోల్లోనే బయటపడ్డాయి. మొత్తం కేసుల సంఖ్య 12,653, మరణాల సంఖ్య 282కు చేరింది.
ఇదీ చూడండి: 'కొవిడ్-19 వ్యాక్సిన్ అభివృద్ధికి భారీ బడ్జెట్ అవసరం'
