కరోనా కేసులు, మరణాల్లో ప్రపంచంలోనే అగ్రస్థానంలో ఉన్న అమెరికాలో ఒక్కరోజే 3,054 మంది కొవిడ్తో మృతి చెందారు. ఇప్పటివరకు రోజువారీ నమోదవుతున్న కొవిడ్ మరణాల్లో ఇవే అత్యధికం. ఈ ఏడాది మే 7న ఇదే స్థాయిలో 2,769 మంది మరణించారు. అగ్రరాజ్యంలో మొత్తం మరణాల సంఖ్య 2 లక్షల 96 వేలు దాటింది. రెండు వ్యాక్సిన్లు దాదాపు అందుబాటులోకి వచ్చేలా కనిపిస్తున్నా.. ఈ స్థాయిలో వైరస్ మరణాలు సంభవించడం వల్ల ప్రజలు తీవ్ర భయాందోళనకు గురవుతున్నారు.
అమెరికాలో బుధవారం ఒక్కరోజే 18 లక్షల కరోనా పరీక్షలు నిర్వహించగా... 2 లక్షల 10 వేల కేసులు వెలుగుచూశాయి. దీంతో మొత్తం కేసుల సంఖ్య కోటి 58 లక్షలు దాటింది.
ఈ నేపథ్యంలో ఫైజర్ టీకా అత్యవసర వినియోగంపై అమెరికా ఆహార, ఔషధ పరిపాలనా సంస్ధ (ఎఫ్డీఏ) సహా సంబంధిత అధికారులు సమావేశం ఏర్పాటు చేశారు. వచ్చే ఏడాది తొలి త్రైమాసికం చివరినాటికి 10 కోట్ల మందికి వ్యాక్సిన్ అందించాలని భావిస్తున్నారు.
టోక్యోలో తొలిసారి
జపాన్లో రాజధాని టోక్యోలో తొలిసారిగా 600కు పైగా కరోనా కేసులు బయటపడ్డాయి. దేశవ్యాప్తంగా 2,810 కేసుల్లో రాజధానిలోనే 602 కేసులు నమోదవడం భయాందోళనకు గురి చేస్తోంది.
ప్రపంచవ్యాప్తంగా మొత్తం 6 కోట్ల 93 లక్షల మందికిపైగా వైరస్ బారిన పడ్డారు. 15 లక్షల 77 వేల మందికిపైగా ప్రాణాలు కోల్పోయారు.
| దేశం | కేసులు | మరణాలు |
| అమెరికా | 1,58,22,734 | 2,96,745 |
| భారత్ | 97,67,371 | 1,41,772 |
| బ్రెజిల్ | 67,30,118 | 1,79,032 |
| రష్యా | 25,69,126 | 45,280 |
| ఫ్రాన్స్ | 23,24,216 | 56,648 |
ఇదీ చూడండి: పెరుగుతున్న గుండె జబ్బుల మరణాలు
