తైవాన్కు స్వయంప్రతిపత్తిని ఇవ్వడానికి నిరాకరిస్తూ, అక్రమాలకు పాల్పడుతున్న చైనాపై అమెరికా అసహనం వ్యక్తం చేసింది. తైవాన్ను సైనిక, ఆర్థిక, దౌత్యపరమైన ఒత్తిడులకు గురిచేయవద్దని డ్రాగన్కు సూచించింది. అందుకు బదులుగా అర్థవంతమైన చర్చలు జరిపి సమస్యలు పరిష్కరించుకోవాలని హితవు పలికింది. ఈ మేరకు అమెరికా అధికార ప్రతినిధి నెడ్ ప్రైస్ శనివారం తెలిపారు.
ఆ సహాయాన్ని కొనసాగిస్తాం..
ఇండో-పసిఫిక్ ప్రాంతంతో తమ సంబంధాలను బలోపేతం చేసేందుకు అమెరికా కట్టుబడి ఉంటుందని ప్రైస్ తెలిపారు. సరిహద్దు సమస్యలను పరిష్కరించడంలో శాంతియుత మార్గానికి అమెరికా మద్దతునిస్తుందని చెప్పారు. తైవాన్ ఆత్మరక్షణ చర్యల్లో తమ సహాయాన్ని కొనసాగిస్తామని తెలిపారు. తైవాన్తో అమెరికా బంధం దృఢమైనదని పేర్కొన్నారు.
రష్యా వైఖరిపైనా ..
రష్యా ప్రతిపక్ష నేత అలెక్సీ నావెల్నీ అరెస్టుకు వ్యతిరేకంగా నిరసిస్తున్న వారిపై, జర్నలిస్టులపై రష్యా ప్రభుత్వ వైఖరిని అమెరికా ఖండించింది. అరెస్టు చేసిన ఆందోళనకారులను వెంటనే విడుదల చేయాలని డిమాండ్ చేసింది.
అలెక్సీ నావెల్నీపై విష ప్రయోగం కేసులో అంతర్జాతీయ సమాజం నిర్వహించే దర్యాప్తునకు సహకరించాలని రష్యాను కోరింది. రష్యా పౌరుల ప్రాథమిక హక్కులకు భంగం వాటిల్లకుండా చర్యలు తీసుకోవాలని సూచించింది.
ఇవీ చూడండి:
