పుల్వామా ఉగ్రదాడితో ఎంతోమంది జవాన్ల మరణానికి కారణమయింది జైషే మహ్మద్ ఉగ్రవాద సంస్థ. ఈ ముఠా వ్యవస్థాపకుడు మసూద్ అజార్ను అంతర్జాతీయ ఉగ్రవాదిగా గుర్తించాలనే ప్రతిపాదనపై నేడు నిర్ణయం వెలువరించనుంది ఐక్యరాజ్యసమితి భద్రతా మండలి. గతనెల 27న ఫ్రాన్స్, బ్రిటన్, అమెరికా చేసిన ఈ ప్రతిపాదనపై ఎలాంటి అభ్యంతరాలు అందకుంటే అంతర్జాతీయ ఉగ్రవాదుల జాబితాలో అజార్ చేరనున్నారు.
మధ్యాహ్నం 3 గంటలకు గడువు ముగింపు
ప్రస్తుతానికి ఈ ప్రతిపాదన నిరభ్యంతర కాల వ్యవధిలో కొనసాగుతోంది. ప్రతిపాదనపై ఏమైనా అభ్యంతాలుంటే 10 రోజుల్లోగా స్పందించాలని గడువు ఇచ్చింది కమిటీ. నేడు 3 గంటలకు ఈ కాలవ్యవధి ముగియనుంది. కమిటీ సభ్యుల ఏకాభిప్రాయంతో తుదినిర్ణయం తీసుకోనున్నారు.
అందరి దృష్టి చైనా వైపే...
అజార్ను అంతర్జాతీయ తీవ్రవాదిగా గుర్తించాలన్న అంశంపై ఇప్పుడు అందరి కళ్లు చైనా వైపే చూస్తున్నాయి. అజార్ను ఈ జాబితాలో చేర్చాలన్న ఎన్నో ప్రతిపాదనలపై గతంలో చైనా అడ్డుతగిలింది. భద్రతా మండలిలో వీటో అధికారంతో చైనా ఇష్టారీతిన వ్యవహరించింది.
పదేళ్లలో నాలుగు సార్లు
మసూద్ను అంతర్జాతీయ తీవ్రవాదిగా గుర్తించాలని ప్రతిపాదించటం గత పదేళ్లలో ఇది నాలుగోసారి. 2009, 2016, 2017లలో భారత్... ఇతర దేశాలతో కలిసి అజార్పై ఐరాసలో ప్రతిపాదనలు చేసింది. పుల్వామా ఉగ్రదాడిని ప్రపంచమంతా ఖండించిన నేపథ్యంలో ఈసారి చైనా.. ఈ ప్రతిపాదనకు మద్దతిస్తుందని విశ్వాసం వ్యక్తం చేసింది అమెరికా.
ఆంక్షలు అమలైతే..
ఐరాస భద్రత మండలి ఆంక్షల జాబితాలోకి అజార్ పేరు చేర్చితే అతని ఆస్తులను స్వాధీనం చేసుకుంటారు. ఉగ్రవాద కార్యకలాపాలకు ఎలాంటి నిధులందకుండా చేస్తారు. అంతర్జాతీయ ప్రయాణాలపై, ఆయుధాల వినియోగంపైనా నిషేధం అమల్లోకి వస్తుంది.
