సెకండ్ హ్యాండ్ కార్ల విక్రయ సంస్థలో జరుగుతున్న స్కాంను బయటపెట్టాలనుకున్నారు ఓ జర్నలిస్ట్. అందుకు ఒక సాధారణ ఉద్యోగిగా చేరారు. తన ప్రతిభతో తక్కువ సమయంలోనే సంస్థ వైస్ డైరెక్టర్గా ఎదిగారు. కానీ, తన వృత్తికి కట్టుబడి అవినీతిని బయటపెట్టారు. లక్షల జీతాన్ని వదిలి తన వృత్తిలో నిమగ్నమయ్యారు. అతనే ఇన్వెస్టిగేటివ్ రిపోర్టర్ లావో కే.
చైనాకు చెందిన సెంట్రల్ టెలివిజన్ (సీసీటీవీ)లో ప్రసారమయ్యే 315 షోలో ఇన్వెస్టిగేటివ్ రిపోర్టర్గా పనిచేస్తున్నారు లావో కే. సీసీటీవీ ఏటా.. వినియోగదారుల దినం సందర్భంగా వారి హక్కులపై ఓ షో నిర్వహిస్తుంది. వేర్వేరు చోట్ల జరిగే అక్రమాలు, కుంభకోణాలపై పరిశోధనాత్మక కథనాలు ప్రసారం చేస్తుంటుంది.
ఈ ఏడాది ప్రసారమైన 315 షో తర్వాత.. లావో కే తన అనుభవాన్ని ఓ వీడియో ద్వారా పంచుకున్నారు. తాను కొద్ది సంవత్సరాల క్రితం ఓ సెకండ్ హ్యాండ్ కార్ల విక్రయ సంస్థలోకి అండర్కవర్ ఆపరేషన్కు వెళ్లినట్లు తెలిపారు. ఆ సంస్థ కార్ల నిజమైన ధర కన్నా ఎక్కువకు అమ్ముతూ ఏ విధంగా మోసం చేస్తోందో తెలిపేందుకే ఆలా చేసిన్నట్లు చెప్పుకొచ్చారు.
తొలుత.. కార్ల సంస్థలో తనకు ఎలాంటి అనుభవం లేని సేల్స్ విభాగంలో చేరారు లావో. అయితే.. ఆ ఉద్యోగం ఇన్వెస్టిగేషన్కు ఉపయోగపడదని గుర్తించారు. ఆ తర్వాత తన ప్రతిభతో ఉన్నత స్థానానికి చేరారు.
" నేను ఎక్కువగా కష్టపడేందుకు ఇష్టపడతాను. సంస్థలో చేరిన తర్వాత నా పనితీరు గణనీయంగా మెరుగుపడింది. సాధారణ సెల్స్మ్యాన్ నుంచి కంపెనీ వైస్ డైరెక్టర్ స్థాయికి చేరుకున్నాను. అలాంటి ఉన్నత స్థానానికి చేరుకుంటానని ఎప్పుడూ అనుకోలేదు."
- లావో కే, ఇన్వెస్టిగేటివ్ రిపోర్టర్
బోర్డు సభ్యుడై...
సంస్థ ఎగ్జిక్యూటివ్ బోర్డులో ఉండటం వల్ల తన ఇన్వెస్టిగేషన్ సాఫీగా సాగిందని తెలిపారు లావో. వివిధ ధరల్లో సంస్థ కొనుగోలు, విక్రయాలకు సంబంధించిన కీలక పత్రాలను పొందటం సులువైనట్లు వెల్లడించారు. ఒక్కోసారి ఒక కారుపై 5000 యువాన్లకుపైగా అదనపు లాభాన్ని పొందేవారని తెలిపారు.
లక్షల జీతం వదులుకుని..
315 షో ప్రసారం తర్వాత.. కార్ల సంస్థలో ఉద్యోగం వదిలేశారు లావో కే. సీసీటీవీలో ఇన్వెస్టిగేటివ్ రిపోర్టర్గా తన విధులను మళ్లీ ప్రారంభించారు. మరో సంస్థలో అవినీతిని బయటపెట్టేందుకు సిద్ధమయ్యారు.
తన పరిశోధనలతో సీసీటీవీ డైరెక్టర్ సంతోషించినప్పటికీ.. అదే సమయంలో తన గురించి ఆందోళన చెందుతున్నారని తెలిపారు లావో. అధిక జీతం, ఇతర ప్రయోజనాలు కోల్పోవటం వల్ల ఇబ్బందులు పడుతున్నానేమోనని ప్రతిరోజు తనకు డైరెక్టర్ కాల్ చేసి అడుగుతున్నారని వెల్లడించారు.
నెటిజన్ల కామెంట్లు..
షో తర్వాత లావో సాహసాన్ని.. హాంగ్కాంగ్ సినిమా 'ఇన్పెర్నల్ అఫైర్స్'తో పోలుస్తూ కామెంట్లు చేశారు నెటిజన్లు.
"ఆయన్ను వెనక్కి రమ్మని మీరు చెప్పకపోయుంటే.. కంపెనీ సీఈఓ అయ్యేవారు. " అని ఓ నెటిజన్ కామెంట్ చేశాడు.
ప్రముఖ సంస్థల అవినీతి బహిర్గతం..
ఈ ఏడాది 315 షోలో... కొహ్లెర్ షాప్స్ వినియోగదారుల డేటాను తెలుసుకునేందుకు ముఖ గుర్తింపును ఉపయోగించటం, యూసీ బ్రౌజర్ ఫేక్ ప్రకటనలను ప్రమోట్ చేయటం, ఇన్ఫినిటీ కార్లలో నకిలీ గేర్బాక్సులు ఉండటం వంటివి సంచలన కథనాలు ఉన్నాయి.
గతంలో ఇదే షోలో పరిశోధనాత్మక కథనాల ప్రసారం తర్వాత ఫోక్స్వాగన్, యాపిల్ వంటి ప్రముఖ సంస్థలు బహిరంగ క్షమాపణలు చెప్పిన సందర్భాలు ఉన్నాయి.
ఇదీ చూడండి: పోకిరి 2.0: అరటి పళ్లు అమ్ముతూ ఎస్ఐ అండర్ కవర్ ఆపరేషన్
