శ్రీలంకలో మరిన్ని ఆత్మాహుతి దాడులు జరిగే అవకాశాలు ఉన్నాయని నిఘా వర్గాలు హెచ్చరించాయి. బౌద్ధాలయాలే లక్ష్యంగా మహిళా ఆత్మాహుతి దళం దాడులకు పాల్పడనున్నట్టు సమాచారం సేకరించాయి లంక నిఘా సంస్థలు.
ఈస్టర్ నాటి పేలుళ్ల తర్వాత ఓ ఇంటిలో తెల్లటి వస్త్రాలను గుర్తించారు పోలీసులు. వాటికి సంబంధించిన విచారణలో భాగంగా మరిన్ని అంశాలను శ్రీలంక నిఘా సంస్థ పసిగట్టింది. ఈ దుస్తులు నిషేధిత ఉగ్రసంస్థ తౌవీద్ జమాత్కు చెందిన మహిళా ఆత్మాహుతి సభ్యులవిగా గుర్తించారు.
మొత్తం 9 మందికి సరిపోయే తెల్లటి వస్త్రాలను కొనుగోలు చేసిన దృశ్యాలు సీసీ కెమెరాల్లో నిక్షిప్తమయ్యాయి. అయితే ఇంటిలో మాత్రం ఐదుగురికి సరిపడే దుస్తులు మాత్రమే కనిపించాయి. ఇందులో ఒకరు ఈస్టర్ దాడిలో పాల్గొన్నట్టు నిఘా సంస్థ చెబుతోంది.
బురఖాలపై నిషేధం
శ్రీలంకలో ఈస్టర్ నాడు జరిగిన ఆత్మాహుతి దాడులను అక్కడి ప్రభుత్వం తీవ్రంగా పరిగణిస్తోంది. మరిన్ని దాడులు జరగకుండా చర్యలు తీసుకుంటోంది. తాజాగా ముస్లిం మహిళలు బురఖాలు ధరించడంపై దేశంలో నిషేధం విధించింది. ఈ విషయాన్ని శ్రీలంక అధ్యక్షుడు మైత్రిపాల సిరిసేన అధికారికంగా ప్రకటించారు.
శ్రీలంకలో జరిగిన ఈస్టర్ ఆత్మాహుతి దాడుల్లో 253 మంది పౌరులు మరణించారు. మరో 500 మంది తీవ్రంగా గాయపడ్డారు. ఇప్పటివరకు దాడులకు సంబంధించి 106 మంది అదుపులోకి తీసుకుని విచారిస్తున్నారు పోలీసులు.
ఇదీ చూడండి: కిరణ్ కోసం యూఏఈ అసాధారణ నిర్ణయం
