కరోనా భయాల నడుమ దక్షిణ కొరియాలో పార్లమెంటు ఎన్నికలు జరుగుతున్నాయి. మాస్క్లు, గ్లౌజులు ధరించి ఆ దేశ పౌరులు ఓటేసేందుకు ముందుకొస్తున్నారు.
దక్షిణ కొరియా ఎన్నికల అధికారులు, ఆరోగ్య శాఖ అధికారులు కరోనా వ్యాప్తించకుండా అనేక జాగ్రత్తలు తీసుకున్నారు. ఓటేసేందుకు వచ్చిన వారు కనీసం మూడు అడుగుల భౌతిక దూరం పాటించేలా చర్యలు చేపట్టారు. పోలింగ్ సిబ్బంది పూర్తిగా రక్షణ దుస్తులు ధరించి విధులు నిర్వహిస్తున్నారు.
ఓటేసేముందు..
ఓటు వేసేందుకు వస్తున్న వారు పోలింగ్ బూత్లోకి ప్రవేశించే ముందు వారికి టెంపరేచర్ స్క్రీనింగ్ నిర్వహిస్తున్నారు అధికారులు. హ్యాండ్ శానిటైజర్తో చేతులు శుభ్రం చేసుకుని.. వాడిపారేసే ప్లాస్టిక్ గ్లౌజులు తొడుక్కున్న తర్వాతే లోపలకు వెళ్లేందుకు అనుమతిస్తున్నారు.
ఎవరికైనా జ్వరం వచ్చినట్లు, లేదా మాస్క్లు ధరించకుండా వచ్చినట్లు గుర్తిస్తే వారిని ప్రత్యేక పోలింగ్ కేంద్రాలకు తరలించి అక్కడ ఓటేసేందుకు అనుమతిస్తున్నారు.
కరోనా రోగుల ఓటు..
కరోనా నిర్ధరణ అయిన వారు ఆస్పత్రుల నుంచే ఈ-మెయిల్ ద్వారా ఓటు హక్కు వినియోగించుకునే వెసులుబాటు కల్పించింది కొరియా ఎన్నికల యంత్రాంగం. ఇలా 400 మంది తమ ఓటు హక్కు వినియోగించుకున్నట్లు ఎన్నికల అధికారులు తెలిపారు.
క్వారంటైన్లో ఉన్నా..
ఏప్రిల్ 1 నుంచి విదేశాల నుంచి వచ్చిన వారిని రెండు వారాల పాటు క్వారంటైన్లో ఉంచుతోంది కొరియా ప్రభుత్వం. ఇలా నిర్బంధంలో ఉన్న వారికీ ఓటేసేందుకు అనుమతిచ్చింది. అయితే వీరు సాయంత్రం 5:30 నుంచి 7 గంటల మధ్య ఇళ్లనుంచి బయటకు వచ్చేందుకు తాత్కాలికంగా వెసులుబాటు కల్పించింది. సాయంత్రం 6 గంటల తర్వాత వారికి ఓటేసేందుకు అనుమతిస్తున్నట్లు అధికారులు తెలిపారు.
ఇలా నిర్బంధంలో ఉన్న వారిలో 13 వేల మంది ఓటేసేందుకు సిద్ధమయ్యారని వెల్లడించారు అధికారులు. వారందరినీ రెండు మీటర్ల భౌతిక దూరం పాటిస్తూ ఓటు హక్కు వినియోగించుకునేలా చర్యలు తీసుకున్నట్లు పేర్కొన్నారు. వీరందరిని ఎప్పటికప్పుడు ట్రాక్ చేస్తున్నట్లు స్పష్టం చేశారు.
అధ్యక్షుడి పార్టీకే సానుకూలం..
దక్షిణ కొరియా ఎన్నికలు ప్రధానంగా సైద్ధాంతిక ఆలోచనలు, స్థానిక అంశాల ఆధారంగా జరుగుతుంటాయి. వీటన్నింటి పరంగా ఆ దేశ అధ్యక్షుడు మూన్ జే ఇన్కు చెందిన లిబరల్ ప్రార్టీకే మద్దతు వస్తున్నట్లు తెలుస్తోంది. పలు సర్వేలూ ఇదే అభిప్రాయం వ్యక్తం చేశాయి.
కరోనా వ్యాపించకుండా మూన్ ప్రభుత్వం వేగంగా స్పందించి క్వారంటైన్ విధానం అమలు చేయడం సహా ఇతర జాగ్రత్తలు తీసుకుంది. ఫలితంగా చైనా, ఐరోపా, అమెరికాలతో పోలిస్తే ఇక్కడ కరోనా ప్రభావం చాలా తక్కువగా ఉంది. ఇవన్నీ లిబరల్ పార్టీకి ఆదరణను మరింత పెంచాయి.
కరోనా వ్యాప్తి నేపథ్యలో దక్షిణ కొరియాలోని ప్రధాన పార్టీలు ర్యాలీలు, బహిరంగ సభలు నిర్వహించలేదు. సామాజిక మాధ్యమాల్లో భారీ ఎత్తున ప్రచారం చేసుకున్నాయి.
దక్షిణ కొరియాలో ఇప్పటి వరకు 10,591 మందికి కరోనా సోకింది. వీరిలో 225 మంది ప్రాణాలు కోల్పోయారు.
