అంతర్జాతీయ ఆర్థిక సాయం పొందే విషయంలో పాకిస్థాన్కు మరోసారి ఎదురుదెబ్బ తగిలింది. మూడు కీలక విధులను నిర్వర్తించడంలో విఫలమైనందున.. ఆ దేశం గ్రే జాబితాలోనే కొనసాగుతుందని ఫైనాన్షియల్ యాక్షన్ టాస్క్ఫోర్స్(ఎఫ్ఏటీఎఫ్) గురువారం స్పష్టం చేసింది. ఉగ్రవాదులకు మనీలాండరింగ్ వ్యవహారాన్ని తనిఖీ చేయడంలో పాక్ వైపు లోపాలు ఉన్నాయని పేర్కొంది. ఈ మేరకు ప్లీనరీ సమావేశం అనంతరం వెల్లడించింది.
ఐక్యరాజ్య సమితి గుర్తించిన ఉగ్రవాదులు, వారి అనుచరులకు వ్యతిరేకంగా పాకిస్థాన్ తప్పనిసరిగా చర్యలు తీసుకోవాలని ఎఫ్ఏటీఎఫ్ తెలిపింది. ఉగ్రవాద చర్యలకు పాల్పడిన వారికి ఆ దేశ న్యాయస్థానాలు తగిన శిక్షలు విధించాలని పేర్కొంది. ఉగ్రవాదులపై ఆర్థిక ఆంక్షలను సమర్థవంతంగా అమలు చేయాలని, ఇందుకోసం ఓ ప్రత్యేక వ్యవస్థను ఏర్పాటు చేసుకోవాలని సూచించింది.
జూన్ సమావేశంలో
మొత్తం 27 విధులను నిర్వర్తించాలని తెలపగా.. 24 విధులనే పాకిస్థాన్ పూర్తి చేసిందని ఎఫ్ఏటీఎఫ్ తెలిపింది. నిర్దేశించిన గడువు ఇప్పటికే ముగిసినందున మిగతా విధులను వీలైనంత త్వరగా పరిష్కరించాలని చెప్పింది. అనంతరం.. జూన్లో జరిగే ప్లీనరీ సమావేశంలో పాక్ పరిస్థితిపై సమీక్షించి, తదుపరి నిర్ణయం తీసుకుంటామని తెలిపింది.
ఇదీ చదవండి:'పేదరికంపై చైనా సంపూర్ణ విజయం!'
