నేపాల్-భారత్ రెండో విడత పెట్టుబడుల ఎక్స్పో కార్యక్రమాన్ని అక్టోబర్ 16-18న నిర్వహించనున్నారు. 3డీ సాంకేతికత ఆధారిత వర్చువల్ వేదిక ద్వారా మూడు రోజుల పాటు ఈ సమావేశం జరగనుంది. 'నేపాల్-ఇండియా ఫ్రాంఛైజ్ ఇన్వెస్ట్మెంట్ ఎక్స్పో అండ్ కాంక్లేవ్' పేరిట ఈ కార్యక్రమం నిర్వహించనున్నట్లు కాఠ్మాండూలోని భారత రాయబార కార్యాలయం ప్రకటన విడుదల చేసింది.
ఫెడరేషన్ ఆఫ్ నేపాలీస్ ఛాంబర్ ఆఫ్ కామర్స్ అండ్ ఇండస్ట్రీ, నేపాల్ ఫ్రాంచైజీ.కామ్ ఈ కార్యక్రమాలను సంయుక్తంగా నిర్వహించనున్నాయి.
"భారత్, నేపాల్ దేశాల్లోని బ్రాండ్లు, ఫ్రాంచైజీలు ఇరుదేశాలకు భారీగా ప్రయోజనం కలిగిస్తాయి. వ్యాపారాలు, త్వరగా ప్రారంభించేందుకు పారిశ్రామికవేత్తలకు అవకాశం కల్పిస్తాయి. రెండో దఫాలో జరుగుతున్న ఈ సదస్సు ద్వారా భారత్లోని ప్రముఖ బ్రాండ్లు నేపాల్కు, నేపాల్లోని బ్రాండ్లు భారత్కు వచ్చేందుకు తోడ్పడుతుంది. ఈ వ్యాపారాలు ఒక దేశం నుంచి మరో దేశానికి రావడం వల్ల పెట్టుబడులు పెరగడమే కాకుండా.. ఆర్థిక వ్యవస్థలకు మేలు కలుగుతుంది."
-నేపాల్లోని భారత రాయబార కార్యాలయం
ఈ ఎక్స్పో తొలి ఎడిషన్ను 2019 మేలో నిర్వహించారు. దీనికి అనూహ్య స్పందన లభించింది. భారత్కు చెందిన 70 బ్రాండ్లు సహా 20 నేపాలీ బ్రాండ్లు ఇందులో పాల్గొన్నాయి. 2 వేల మందికి పైగా నేపాలీ పారిశ్రామిక వేత్తలు ఇందులో పాల్గొన్నారు. భారత పారిశ్రామికవేత్తలతో అనుసంధానం వల్ల వ్యాపారాల్లో అవకాశాలపై ఓ అవగాహనకు వచ్చారు.
ఇదీ చదవండి- 'హాథ్రస్ వ్యవహారాన్ని డబ్బుతో సెటిల్ చేసేశాం కదా!'
