కరోనా వైరస్ వ్యాక్సిన్ స్పుత్నిక్-వీని భారత్లో ఉత్పత్తి చేసేందుకు కేంద్ర ప్రభుత్వం, ప్రముఖ ఔషధ తయారీ సంస్థలతో చర్చలు జరుపుతోంది రష్యా. ఆ దిశగా పలు ఒప్పందాలు చేసుకున్నట్లు తెలిపారు రష్యా ప్రత్యక్ష పెట్టుబడి నిధి (ఆర్డీఐఎఫ్) సీఈఓ కిరిల్ దిమిత్రివ్.
ఆర్డీఐఎఫ్, గమలేయా ఔషధ సంస్థ సంయుక్తంగా అభివృద్ధి చేసిన వ్యాక్సిన్ స్పుత్నిక్-వీని ఆగస్టు 11న విడుదల చేసింది రష్యా. ప్రపంచవ్యాప్తంగా విడుదలైన తొలి టీకాగా గుర్తింపు పొందింది. ఈ టీకా మంచి ఫలితాలు ఇస్తోందని ద లాన్సెట్ జర్నల్ కథనం ప్రచూరించింది. ఈ నేపథ్యంలో ప్రపంచవ్యాప్తంగా వ్యాక్సిన్పై ఆశలు రేకెత్తుతున్నాయి.
రష్యాకు చాలా ముఖ్యమైన భాగస్వామి భారత్. వ్యాక్సిన్ ఉత్పత్తిలో ముందున్న దేశాల్లో భారత్ ఒకటి. ప్రపంచవ్యాప్తంగా ఉన్న వ్యాక్సిన్లలో 60 శాతం భారత్లోనే తయారయ్యాయి. స్పుత్నిక్ -వీ వ్యాక్సిన్ను భారత్లో ఉత్పత్తి చేసేందుకు సంబంధిత మంత్రిత్వ శాఖలు, ప్రభుత్వం, ప్రముఖ ఔషధ సంస్థలతో చర్చలు జరుపుతున్నాం. ఇప్పటికే ప్రముఖ కంపెనీలతో పలు ఒప్పందాలు కుదుర్చుకున్నాం.
- కిరిల్ దిమిత్రివ్, ఆర్డీఐఎఫ్ సీఈఓ
స్వదేశీ మార్కెట్తో పాటు ఇతర దేశాల కోసం కూడా వ్యాక్సిన్ ఉత్పత్తి చేసే సామర్థ్యం భారత్కు ఉందని గుర్తించినట్లు తెలిపారు కిరిల్. రష్యా వ్యాక్సిన్ పనితీరుపై భారత భాగస్వామ్య సంస్థలు అవలంబించిన సమతుల్య విధానాన్ని అభినందిస్తున్నామని తెలిపారు. మా వ్యాక్సిన్పై విమర్శలు చేయకుండా.. అర్థం చేసుకునే ప్రయత్నం చేశారని కొనియాడారు.
ఇదీ చూడండి: గుడ్న్యూస్: రష్యా 'స్పుత్నిక్ వీ' వ్యాక్సిన్ సేఫ్
