న్యూజిలాండ్ నుంచి చైనాకు పశువులను తీసుకెళుతున్న నౌక.. జపాన్ సమీపంలో మునిగిపోయింది. ఆ సమయంలో ఆ నౌకలో 42 మంది సిబ్బంది, 5,800 ఆవులు ఉన్నాయి.
ఈ ప్రమాదంలో ప్రాణాలతో బయడపడ్డ ఓడ సిబ్బందిలో ఒకరిని జపాన్ నావికాదళం కాపాడింది. అతనిచ్చిన సమాచారం ప్రకారం తూర్పు చైనా సముద్రంలో మునిగిపోయిన ఓడ కోసం గాలింపు చేపట్టారు.
ప్రమాదానికి కారణం ఇంకా తెలియరాలేదు. అయితే, మేసాక్ తుపాను కారణంగా ఆ ప్రాంతంలో వాతావరణం సంక్లిష్టంగా ఉందని జపాన్ అధికారులు తెలిపారు. ప్రస్తుతం వాతావరణం అనుకూలంగా ఉందని, గాలింపు కొనసాగుతోందని స్పష్టం చేశారు.
ఇదీ చూడండి: కొరియాలో మేసాక్ తుపాను బీభత్సం
అలా తెలిసింది...
జపాన్ దక్షిణ ద్వీపం సమీపంలో నీటిలో లైఫ్ జాకెట్ సాయంతో తేలియాడుతున్న సిబ్బందిని నౌకాదళం నిఘా విమానం పీ-3సీ గుర్తించింది. అనంతరం అతనని తీరప్రాంత గస్తీ సిబ్బంది కాపాడారు. ప్రాణాలతో బయటపడ్డ వ్యక్తి ఫిలిప్పీన్స్కు చెందినవాడని జపాన్ అధికారులు తెలిపారు. అతను ఆరోగ్యంగానే ఉన్నాడని, నౌక ప్రమాదం గురించి అతడే సమాచారం ఇచ్చాడని స్పష్టం చేశారు.
ఓడలో 42 మంది సిబ్బంది ఉన్నట్లు తెలుస్తోంది. ఇందులో 38 మంది ఫిలిప్పీన్స్కు చెందినవారు కాగా.. న్యూజిలాండ్, ఆస్ట్రేలియా దేశస్థులు ఇద్దరు చొప్పున ఉన్నారు.
నేపియర్ నుంచి బయలుదేరి..
మునిగిపోయిన ఓడ.. యూఏఈకి చెందిన గల్ఫ్ నేవిగేషన్కు చెందినదిగా గుర్తించారు. న్యూజిలాండ్లోని నేపియర్ నౌకాశ్రయం నుంచి 5,800 ఆవులతో ఆగస్టు రెండోవారంలో బయలుదేరింది. చైనా తూర్పు తీరంలోని తాంగ్షాన్ ఓడరేవును చేరుకోవాల్సి ఉంది.
ఇదీ చూడండి: అమెరికానే తలదన్నేలా.. చైనా 'అణు' ప్రణాళికలు
