మయన్మార్ కీలకనేత ఆంగ్ సాన్ సూకీని ఆ దేశ సైన్యం గృహనిర్బంధంలో ఉంచినట్లు సమాచారం. సూకీ సహా అధికార నేషనల్ లీగ్ ఫర్ డెమొక్రసీ(ఎన్ఎల్డీ) పార్టీ చైర్మన్ను సోమవారం ఉదయం సైన్యం అదుపులోకి తీసుకునట్లు మయన్మార్ మీడియా తెలిపింది. రాజధాని నేపిడాలో టెలిఫోన్, ఇంటర్నెట్ సేవలు నిలిపివేశారని పేర్కొంది. ఎన్ఎల్డీ పార్టీ నాయకులతో ఫోన్లో మాట్లాడే వీలు లేదని చెప్పింది.
అనంతరం మయన్మార్ ఇప్పుడు పూర్తిగా తమ నియంత్రణలో ఉందని సైన్యం ప్రకటించింది. ఏడాదిపాటు పాలన తమ నియంత్రణలోనే ఉంటుందని ఆర్మీ అధికారిక మీడియా ద్వారా వెల్లడించింది.
గతేడాది జరిగిన ఎన్నికల తర్వాత తొలి పార్లమెంట్ సమావేశాల్లో పాల్గొనేందుకు మయన్మార్ చట్టసభ్యులు సోమవారం నేపిడాలో సమావేశం కావాల్సి ఉంది. ఈ ఎన్నికలు అక్రమంగా జరిగాయని సైనిక తిరుగబాటు తప్పదని మిలిటరీ అధికారులు కొద్ది రోజుల క్రితమే హెచ్చరించారు.
నవంబర్లో జరిగిన పార్లమెంటు ఎన్నికల్లో సూకీ పార్టీ 476 స్థానాలకు గానూ, 396 స్థానాలు కైవసం చేసుకుని మరోసారి అధికారంలోకి వచ్చింది. దశబ్దాల సైనిక పాలన నుంచి విముక్తి కల్పిస్తూ 2015లో తొలిసారి గెలిచారు.
అమెరికా హెచ్చరిక..
మయన్మార్లో పరిస్థితులకు నిశితంగా పరిశీలిస్తున్నట్లు అమెరికా తెలిపింది. ప్రజాస్వామ్య పరివర్తనను అణగదొక్కడానికి మయన్మార్ సైన్యం ప్రయత్నిస్తున్నట్లు తమ దృష్టికి వచ్చిందని ప్రకటనలో పేర్కొంది. నిర్బంధంలో ఉంచిన సూకీ, ఇతర నాయకులను విడుదల చేయాలని సైన్యానికి సూచించింది. ప్రజాస్వామ్య సంస్థలకు తమ మద్దతు ఉంటుందని చెప్పింది.
