హాంకాంగ్లో మరోసారి పెద్ద ఎత్తున నిరసనలు వెల్లువెత్తాయి. చైనా జాతీయ గీతాన్ని దుర్వినియోగం చేయడాన్ని నేరంగా పరిగణించే బిల్లుకు సంబంధించి చట్టసభ సభ్యులు చర్చలు జరుపుతుండగా.. హాంకాంగ్లో వేలాది మంది నిరసనకారులు ఆందోళన చేపట్టారు. ప్రజాస్వామ్యానికి అనుకూలంగా.. పోలీసులకు వ్యతిరేకంగా నినాదాలు చేశారు.
అసెంబ్లీ సమావేశానికి ముందు.. శాసనసభ భవనం వెలుపల పెద్ద ఎత్తున నిరసన తెలిపారు. వీరిని నిలువరించేందుకు భారీ సంఖ్యలో పోలీసులు రంగంలోకి దిగారు.
కాజ్వే బేయ్ జిల్లాలోని ఓ షాపింగ్మాల్ ఎదుట సుమారు 50 మందికిపైగా నిరసన చేస్తుండగా... పోలీసులు పెప్పర్ స్ప్రేను ప్రయోగించారు. విధుల్లో ఉన్న పాత్రికేయులను కూడా అడ్డుకున్నారు. అనధికారికంగా గుమిగూడిన సుమారు 300 మందిని అరెస్ట్ చేసినట్లు హాంకాంగ్ పోలీసులు పేర్కొన్నారు. నిబంధనలకు విరుద్ధంగా గ్యాసోలిన్ బాంబులు కలిగి ఉన్న మరో 17 మంది యువకులను కూడా అదుపులోకి తీసుకున్నారు.
జాతీయగీతాన్ని అవమానపరిస్తే అంతే..
సెమీ స్వయం ప్రతిపత్తి కలిగిన దేశమైన హాంకాంగ్లో చైనా జాతీయ గీతం 'మార్చ్ ఆఫ్ ద వలంటీర్స్'ను అవమానించడం, దుర్వినియోగ పరచడాన్ని తాజాగా తీసుకొచ్చిన బిల్లు వ్యతిరేకిస్తుంది. ఈ నేరానికి పాల్పడిన వారికి మూడేళ్ల జైలు శిక్షతో పాటు.. 50 వేల హాంకాంగ్ డాలర్లు జరిమానాగా విధిస్తారు. గతేడాది ఫుట్బాల్ ప్రపంచకప్ క్వాలిఫైయింగ్ గేమ్లో అభిమానులు జాతీయగీతాన్ని అవమానపరచడం వల్ల.. హాంకాంగ్ ఫుట్బాల్ అసోసియేషన్కు జరిమానా విధించింది ఫిఫా.
ఇదీ చదవండి: ముదురుతున్న భారత్-చైనా వివాదం.. మరో డోక్లాం అయ్యేనా?
