సరైన చర్యల ద్వారా రాజకీయ అనిశ్చితికి తెరదించాలని నేపాల్ కమ్యూనిస్టు పార్టీ(ఎన్సీపీ) నేతలను చైనా కోరింది. ఇందుకోసం.. చైనా ఉన్నత స్థాయి ప్రతినిధుల బృందం కృషి చేస్తున్నట్లు తెలిపింది. త్వరలోనే నేపాల్లో సంక్షోభం సద్దుమణుగుతుందని ఆశిస్తున్నట్లు చైనా విదేశాంగ ప్రతినిధి జావో లిజియాన్ వెల్లడించారు.
"ఒక మిత్రునిలా నేపాల్లో త్వరలోనే రాజకీయ అనిశ్చితి తొలిగిపోతుందని ఆశిస్తున్నాం. దేశ ప్రయోజనాలను దృష్టిలో ఉంచుకుని నేపాల్ కమ్యూనిస్టు పార్టీ వర్గాలు అంతర్గత విభేదాలను పరిష్కరించుకుంటాయని, రాజకీయ స్థిరత్వాన్ని సాధిస్తాయని నమ్ముతున్నాం. స్వేచ్ఛ, సమానత్వం, పరస్పర గౌరవ సూత్రాలను చైనా కమ్యూనిస్టు పార్టీ(సీసీపీ ) సమర్థిస్తుంది. నేపాల్, చైనాల మధ్య ఎన్నో ఏళ్లుగా మంచి స్నేహబందం ఉంది."
-- జావో లిజియాన్, చైనా విదేశాంగ ప్రతినిధి
నేపాల్లో నెలకొన్న రాజకీయ అనిశ్చితిపై ఆరా తీసేందుకు చైనా నుంచి ఉన్నత స్థాయి ప్రతినిధుల బృందం ఆదివారం ఉదయం కాఠ్మాండుకు చేరుకుంది. నేపాల్ ప్రధాని కేపీ శర్మ ఓలీ, ఎన్సీపీ ఎగ్జిక్యూటివ్ ఛైర్మన్ ప్రచండ వర్గం నేతలతో సంప్రదింపులు జరుపుతోంది.
ఇదీ చూడండి:నేపాల్ అగ్రనేతలతో చైనా బృందం భేటీ
