ప్రధానమంత్రి నరేంద్రమోదీ భూటాన్లో పర్యటించనున్నారు. ఈనెల 17,18 తేదీల్లో రెండు రోజుల పాటు ఈ పర్యటన సాగనుంది. ఇరుదేశాల మధ్య ద్వైపాక్షిక సంబంధాల బలోపేతం, జలవిద్యుత్ రంగంలో పరస్పర సహకారం తదితర అంశాలపై భూటాన్ రాజు జిగ్మే ఖేసర్ నగ్మే వాంగ్చుక్తో చర్చించనున్నారు. ఆ దేశ ప్రధాని లోటే షెరింగ్తోనూ సమావేశం కానున్నారు మోదీ.
'మాంగ్దెచూ జలవిద్యుత్ ప్రాజెక్టు'కు ప్రధాని శంకుస్థాపన చేయనున్నారు. మోదీ భూటాన్ పర్యటనలో ఇదే ప్రధానాంశంగా నిలుస్తుందని విదేశీ కార్యదర్శి విజయ్ గోఖలే మీడియాకు తెలిపారు. అనంతరం భూటాన్ రాజధాని థింపూలోని రాయల్ విశ్వవిద్యాలయంలో ప్రధాని ప్రసంగిస్తారని ప్రకటించారు.
" భూటాన్ 12వ పంచవర్ష ప్రణాళికకు రూ. 5వేల కోట్లు ఆర్థిక సాయమందిస్తామని భారత్ హామీనిచ్చింది. అందులో భాగంగా మొదటి విడత నిధులను ప్రభుత్వం ఇప్పటికే విడుదల చేసింది."
-విజయ్ గోఖలే, విదేశాంగ కార్యదర్శి
