అసత్య ప్రచారాల ద్వారా అసలు సమస్య నుంచి దృష్టి మరల్చేందుకు పాకిస్థాన్ చేసిన ప్రయత్నాలు మరోసారి విఫలమయ్యాయని ఐరాసలో భారత శాశ్వత ప్రతినిధి సయ్యద్ అక్బరుద్దీన్ విమర్శించారు. కశ్మీర్ అంశంపై పాకిస్థాన్, చైనాలకు ఐక్యరాజ్యసమితి భద్రతా మండలిలో భంగపాటు ఎదురైన నేపథ్యంలో ఆయన ఈ వ్యాఖ్యలు చేశారు.
"ఈ సమావేశంలోని ఫలితాలు మేము ఉహించినవే. గందరగోళాన్ని సృష్టించాలన్న పాకిస్థాన్ ప్రతినిధుల ప్రణాళికలు విఫలమవడం సంతోషకరం. కశ్మీర్ అంశంపై ఐరాస వేదికగా వారు చేసిన ఆరోపణలు నిరాధారమైనవని మరోసారి రుజువైంది. ఈ సంకేతాలను దృష్టిలో పెట్టుకుని భారత్తో సంబంధాలను మెరుగుపరుచుకునే విధంగా పాకిస్థాన్ అడుగులు వేయాలని ఆశిస్తున్నాం."
- సయ్యద్ అక్బరుద్దీన్, ఐరాసలో భారత శాశ్వత ప్రతినిధి.
కశ్మీర్ అంశంలో భారత్పై అనేక ఆరోపణలు చేస్తూ పాకిస్థాన్ విదేశాంగమంత్రి మహమూద్ ఖురేషీ ఐరాసకు లేఖ రాశారు. ఈ లేఖకు మద్దతు ప్రకటిస్తూ ఐక్యరాజ్యసమితి భద్రతా మండలిలో సమావేశం నిర్వహించి చర్చకు పట్టుబట్టింది చైనా. కానీ చైనా ప్రతిపాదనను సభ్య దేశాలు తిరస్కరించాయి. సమస్యను ద్వైపాక్షిక చర్చల ద్వారా పరిష్కరించుకునే సామర్థ్యం భారత్-పాక్కు ఉందని ఇతర సభ్య దేశాలు తేల్చిచెప్పాయి. ఈ అంశంలో మండలి జోక్యం అనవసరమని స్పష్టం చేశాయి.
తన మిత్రదేశం పాక్కు మద్దతుగా చైనా.. కశ్మీర్ అంశాన్ని లేవనెత్తడం ఇది మూడోసారి. గత నెలలో ఐరాస రహస్య సమావేశంలో కశ్మీర్ గురించి చర్చించడానికి చైనా చేసిన ప్రయత్నాన్ని ఫ్రాన్స్, అమెరికా, బ్రిటన్‌, రష్యా నిలువరించాయి.
ఇదీ చూడండి:- గుడి దగ్గర మహిళ నగ్న మృతదేహం.. ఆమె తల ఎక్కడ?
