అంతర్జాతీయ ఆర్థిక సాయం పొందే విషయంలో పాకిస్థాన్కు మరోసారి ఎదురుదెబ్బ తగిలింది. ఆ దేశాన్ని 'గ్రే' లిస్టులోనే కొనసాగించాలని ఫైనాన్షియల్ యాక్షన్ టాస్క్ఫోర్స్(ఎఫ్ఏటీఎఫ్) నిర్ణయించింది. నిర్దేశించిన 34 విధుల్లో 30 విధులను మాత్రమే నిర్వర్తించినందున ఈ నిర్ణయం తీసుకుంది. ఈ మేరకు వర్చవల్గా నిర్వహించిన ప్లీనరీ సమావేశంలో నిర్ణయం తీసుకున్నామని ఎఫ్ఏటీఎఫ్ అధ్యక్షుడు మార్కస్ ప్లీయర్ తెలిపారు.
పాకిస్థాన్ ఇప్పటివరకు ఉగ్రవాదానికి వ్యతిరేకంగా చాలా కీలకమైన చర్యలు చేపట్టిందని ఎఫ్ఏటీఎఫ్ తెలిపింది. అయితే.. ఐక్యరాజ్య సమితి గుర్తించిన ఉగ్రవాదులు హఫీజ్ సాయిద్, మసూద్ అజర్ సహా వారి బృందాలకు వ్యతిరేకంగా తీసుకుంటున్న చర్యలను పాక్ మరింత పెంచాల్సిన అవసరం ఉందని ఎఫ్ఏటీఎఫ్ పేర్కొంది.
'గ్రే' జాబితా నుంచి మారిషస్, బోట్స్వానా దేశాలను ఎఫ్ఏటీఎఫ్ తొలిగించింది. ఈ నేపథ్యంలో ఆ దేశాలకు మార్కస్ ప్లీయర్ అభినందనలు తెలిపారు. మరోవైపు.. జోర్డాన్, మాలీ, టర్కీ దేశాలను తమ జాబితాలో చేర్చుతున్నట్లు ఎఫ్ఏటీఎఫ్ తెలిపింది. ఈ మూడు దేశాలు ఉగ్రవాదానికి వ్యతిరేకంగా కార్యచరణ చేపట్టడానికి అంగీకరించాయని చెప్పింది.
ఇదీ చూడండి: Afgan taliban: అఫ్గాన్లో మహిళల నిరసనలు హింసాత్మకం!
ఇదీ చూడండి: రెస్టారెంట్లో భారీ పేలుడు- నలుగురు మృతి
