సిక్కుల పవిత్ర పుణ్యక్షేత్రాలలో ఒకటైన కర్తార్పుర్ యాత్రపై కొర్రీలు పెడుతోంది పాకిస్థాన్. యాత్రికులను ఏడాది పొడవునా అనుమతించాలన్న భారత్ ప్రతిపాదనను తోసిపుచ్చింది. కర్తార్పుర్ కారిడార్ యాత్రపై పలు నిబంధనలు, షరతులు విధించింది.
కర్తార్పుర్లోని గురుద్వార్ దర్బార్ సాహిబ్ను దర్శించుకునేందుకు రోజుకు 5000 మంది భక్తులను అనుమతించాలని భారత్ ప్రతిపాదించింది. కానీ 700 మంది యాత్రికులను మాత్రమే అనుమతిస్తామని పేర్కొంది పాక్. వీరికి ప్రత్యేక అనుమతులు అవసరమని తెలిపింది. భక్తులకు ఉచిత వీసా సౌకర్యం కల్పించాలన్న భారత ప్రతిపాదనను పెడచెవిన పెడుతూ.. వీసా ఛార్జీలు వసూలు చేయనున్నట్లు పేర్కొంది.
భారతీయులతో పాటు విదేశాల్లోని భారత సంతతికి చెందిన వారినీ ఈ యాత్రకు అనుమతించాలని భారత్ కోరింది. కేవలం భారతీయులనే అనుమతిస్తామని పాక్ స్పష్టం చేసింది. యాత్రకు వచ్చే బృందాల్లో 15 మందిని మాత్రమే అనుమతిస్తామని తెలిపింది.
యాత్ర ప్రత్యేక రోజున 10వేల మందికి అనుమతి, రవి నదిపై వంతెన నిర్మాణం, కాలినడక యాత్రికులకు అనుమతి వంటి భారత్ ప్రతిపాదనలపై ఎలాంటి స్పందన తెలపలేదు పాక్.
కర్తార్పుర్ కారిడాన్ నిర్మాణానికి పాక్ నుంచి సహకారం లేకపోయినప్పటికి పనులు వేగంగా సాగుతున్నాయి. గురునానక్ దేవ్ 550వ జన్మదినంలోగా ఈ ఏడాది నవంబర్ 12 వరకు ఈ ప్రాజెక్ట్ పూర్తి చేయాలని ప్రభుత్వం లక్ష్యంగా పెట్టుకుంది.
ఇదీ చూడండి: 'చోక్సీ కోసం ఎయిర్ అంబులెన్స్ ఏర్పాటు చేస్తాం'
