బాబ్రీ కేసు తీర్పును ఖండించిన పాక్​

బాబ్రీ కేసులో నిందితులందరిని నిర్దోషులుగా తేల్చిన సీబీఐ ప్రత్యేక కోర్టు తీర్పును పాకిస్థాన్​ ఖండించింది. భారత్​లోని మైనారిటీలకు భద్రత కల్పించాలని విజ్ఞప్తి చేసింది. అయితే బాబ్రీ తీర్పుపై అక్కడి మీడియా విస్తృతంగా కథనాలు ప్రచురించింది. తీర్పు వివాదాస్పదమని అభివర్ణించింది.

బాబ్రీ కేసులో 32మంది నిందితులను నిర్దోషులుగా ప్రకటిస్తూ భారత్​లోని సీబీఐ ప్రత్యేక న్యాయస్థానం ఇచ్చిన తీర్పును పాకిస్థాన్​ ఖండించింది. బాబ్రీ మసీదు ఘటనకు సంబంధం ఉన్న అందరినీ నిర్దోషులుగా తేల్చడాన్ని పాక్​ విదేశాంగశాఖ కార్యాలయం తప్పుబట్టింది.

"దేశంలోని మైనారిటీలు, ముఖ్యంగా ముస్లింలు, వారి ప్రార్థనా మందిరాలకు భద్రత కల్పించాలని భారత ప్రభుత్వానికి పాక్​ అభ్యర్థిస్తోంది. బాబ్రీ కేసులో అందరినీ నిర్దోషులుగా తేల్చడం సిగ్గుచేటు."

--- పాకిస్థాన్​ విదేశాంగశాఖ.

అయితే గతంలో అనేక మార్లు భారత అంతర్గత విషయాల్లో పాకిస్థాన్​ జోక్యం చేసుకుంది. ఆయా సందర్భాల్లో పాక్​పై తీవ్ర స్థాయిలో విరుచుకుపడింది భారత్​.

మీడియా కథనాలు...

మరోవైపు బాబ్రీ కేసు తీర్పునకు పాకిస్థాన్​ మీడియా అత్యంత ప్రాముఖ్యతను ఇచ్చింది. డాన్​, జియో, ఎక్స్​ప్రెస్​ ట్రిబ్యూన్​, జంగ్​లు విస్తృతంగా కథనాలు ప్రచురించాయి. తీర్పును వివాదాస్పదమని అభివర్ణించాయి.

ఇదీ చూడండి:- బాబ్రీ మసీదు కేసు.. పూర్తి కథనాలు