అమెరికా-ఉత్తర కొరియా మధ్య అణు వివాదం తారస్థాయికి చేరుకుంది. ఉత్తర కొరియా ప్రతికూల విధానాలను అమెరికా వీడనంత వరకు అణు నిరాయుధీకరణను కొనసాగించేది లేదని తేల్చి చెప్పింది కిమ్ ప్రభుత్వం. స్వీడన్ వేదికగా జరిగిన చర్చలు విఫలమైన మరుసటి రోజునే ఈ మేరకు వ్యాఖ్యానించింది.
గత ఫిబ్రవరిలో అమెరికా అధ్యక్షుడు డొనాల్డ్ ట్రంప్, కొరియా అధినేత కిమ్ జోంగ్ ఉన్ల భేటీ తర్వాత నెలకొన్న ప్రతిష్టంభనకు తెరదించేందుకు స్వీడన్లోని స్టాక్హోం వేదికగా చర్చలు చేపట్టాయి ఇరుదేశాలు. కానీ ఈ చర్చలు ఎలాంటి పరిష్కారం లేకుండానే ముగిశాయి. అమెరికా ప్రతిపాదించిన అంశాలు తమకు సంతృప్తికరంగా లేవని పేర్కొంది ఉత్తర కొరియా. అమెరికా పాత వైఖరినే ఇప్పుడూ అవలంబించటమే ఇందుకు కారణమని పేర్కొంది.
"కొరియా విరుద్ధ విధానాలను వీడనాడేందుకు అమెరికా ఆచరణాత్మక చర్యలు తీసుకోకపోతే చర్చలు కష్టమే. కొరియా-అమెరికా మధ్య చర్చల సఫలత అనేది వాషింగ్టన్ చేతిలోనే ఉంది. అందుకు ఈ ఏడాది చివరి వరకు గడువు ఉంది."
- ఉత్తర కొరియా విదేశాంగ శాఖ
ఉత్తర కొరియాలో పూర్తి స్థాయిలో అణ్వాయుధాలను నిర్మూలించాలనే లక్ష్యంతో ట్రంప్-కిమ్ 2018 జూన్లో తొలిసారి భేటీ అయ్యారు. కానీ వారి చర్చల్లో ఎలాంటి పురోగతి కనిపించలేదు. పలుమార్లు ఇరు దేశాలు చర్చలు కొనసాగించినా ఎలాటి ఫలితం రాలేదు.
ఇదీ చూడండి: కేన్సస్ బార్లో మళ్లీ కాల్పులు- నలుగురు మృతి
