ఓలీ విముఖత- మళ్లీ మొదటికి నేపాల్ సంక్షోభం!

​ప్రభుత్వ ఏర్పాటుకు ముందుకు రావాల్సిందిగా తమ దేశ రాజకీయ పార్టీలకు నేపాల్ అధ్యక్షురాలు బిద్యా దేవి భండారి పిలుపునిచ్చారు. ప్రధానిగా ఇటీవల మళ్లీ బాధ్యతలు చేపట్టిన కేపీ శర్మ ఓలీ.. పార్లమెంటులో బలనిరూపణకు విముఖత చూపినట్లు తెలుస్తోంది.

నేపాల్​లో రాజకీయ సంక్షోభం కొనసాగుతోంది. ప్రభుత్వ ఏర్పాటుకు ముందుకు రావాల్సిందిగా తమ దేశ రాజకీయ పార్టీలకు అధ్యక్షురాలు బిద్యా దేవి భండారి గురువారం పిలుపునిచ్చారు. ఇందుకు శుక్రవారం సాయంత్రం 5 గంటల వరకు గడువునిచ్చారు. ప్రధానమంత్రిగా కేపీ శర్మ ఓలీ ఇటీవల మళ్లీ ప్రమాణం చేసినప్పటికీ.. ప్రతినిధుల సభలో బల నిరూపణకు విముఖత చూపినట్లు తెలుస్తోంది. ఈ నేపథ్యంలో ప్రభుత్వాన్ని ఏర్పాటు చేయడానికి ఇతర రాజకీయ పార్టీలు చొరవ తీసుకోవాలని అధ్యక్షురాలు కోరారు.

నేపాల్​ కమ్యూనిస్టు పార్టీ(యూనిఫైడ్​ మార్కిస్ట్​-లెనినిస్ట్​) ఛైర్మన్​ అయిన ఓలీ.. పార్లమెంటులో బలం నిరూపించలేకపోవడం వల్ల రాజీనామా చేశారు. ఆ తర్వాత ప్రభుత్వ ఏర్పాటులో మిగిలిన పార్టీలు విఫలమయ్యాయి. ఈ నేపథ్యంలో ఈ నెల 14న ఓలీ ప్రధానమంత్రిగా బాధ్యతలు చేప్టటారు. నెల రోజుల్లోగా పార్లమెంటులో బలాన్ని నిరూపించుకోవాల్సి ఉన్నప్పటికీ.. ప్రధాని సిఫార్సు మేరకు ప్రభుత్వ ఏర్పాటుకు రావాల్సిందిగా ఇతర పార్టీలను అధ్యక్షురాలు ఆహ్వానించారు.

ఇదీ చూడండి: ఓలీ సర్కారుకు సుప్రీంకోర్టులో తాత్కాలిక ఊరట