పాక్ ప్రధాని భార్యకు అద్భుత శక్తి- అద్దంలో ఆమె కనిపించరట!

అద్దం ఎదురుగా నిల్చుంటే ఏమవుతుంది? మన ప్రతిబింబం కనిపిస్తుంది. అది సహజం. కానీ... పాక్ ప్రధాని భార్య విషయంలో అలా జరగడంలేదట. ఆమెకు అతీంద్రియ శక్తులు ఉండడమే అందుకు కారణమట. పాక్ మీడియా ప్రసారం చేసిన ఈ వార్తల్లో నిజమెంత..?

పాకిస్థాన్ ప్రథమ మహిళ,​ ప్రధాన మంత్రి ఇమ్రాన్​ఖాన్ భార్య బుష్రా బీబీకి అతీంద్రియ శక్తులు ఉన్నాయా...? ఆమె ప్రతిబింబం అద్దంలో కనిపించదా...? ఈ ప్రశ్నకు ఔననే జవాబిస్తోంది పాకిస్థాన్​ మీడియా. పాక్ ప్రధాని నివాసంలో పనిచేస్తున్న సిబ్బంది ఈ విషయాన్ని ధ్రువీకరించారంటూ పెద్ద కథనాన్నే ప్రసారం చేసింది ఓ టీవీ ఛానల్​. ఇందుకు సాక్ష్యం ఇదేనంటూ ఓ ఫొటోనూ చూపించింది.

బుష్రా బీబీకి ప్రత్యేక శక్తులు ఉన్నాయన్న అంశంపై ట్విట్టర్​లో పెద్ద చర్చే నడుస్తోంది. కొందరు పాత్రికేయులు... బుష్రా బీబీకి సంబంధించిన ఫొటోలు కల్పితమని అంటున్నారు.

వాటూ వంశస్థురాలైన 41 ఏళ్ల బుష్రా రియాజ్ వట్టూ.. పాక్​లో పవిత్ర పుణ్యక్షేత్రమైన పాక్‌పట్టన్‌కు చెందినవారు. అక్కడే ఆధ్యాత్మిక శక్తులు సొంతం చేసుకోవడంలో శిక్షణ తీసుకున్నారు. లాహోర్ నుంచి 250 కిలోమీటర్ల దూరంలో ఈ ప్రదేశం ఉంటుంది.

ఎన్నికలకు ముందే వివాహం

ఆధ్యాత్మిక శక్తులున్న బీబీని.. ప్రధాని ఎన్నికలకు కేవలం ఆరునెలల ముందు మూడో భార్యగా వివాహమాడారు ఇమ్రాన్​. మొదట్లో.. ఆయన ప్రధాని కావాలంటే వాటూ వంశానికి చెందిన తన కుమార్తెనో లేక చెల్లినో పెళ్లి చేసుకోవాలని ఇమ్రాన్​కు సూచించారు బీబీ. ఆ తర్వాత కచ్చితంగా పెళ్లి అయిన మహిళను, ఐదుగురు పిల్లల తల్లిని వివాహం చేసుకోవాలని ఆమెకు కల వచ్చినట్లు ఆయనకు చెప్పారు. ఫలితంగా బుష్రానే మనువాడారు ఇమ్రాన్​.

బుర్ఖా ధరించిన మొదటి మహిళ!

పాక్​ ప్రధాన మంత్రి భార్యగా అధికారిక కార్యక్రమాల్లోనూ బుర్ఖా ధరించిన మొదటి మహిళగా నిలిచారు బీబీ. ఐరాస 74వ సర్వసభ్య సమావేశాలకు న్యూయార్క్​కు వెళ్లే ముందు భార్య బుష్రా బీబీతో కలిసి ఉమ్రా(నమాజ్​)లో పాల్గొన్నారు ఇమ్రాన్​. అప్పుడు బుష్రా ముఖం కనిపించకుండా.. బుర్ఖా ధరించినట్లు పాక్​ మీడియా వర్గాలు పేర్కొన్నాయి.

అయితే బుర్ఖా... తన ఆధునికతను నిర్వచించదని, ముఖాన్ని బట్టి కాకుండా వ్యక్తిత్వాన్ని బట్టి తనను అర్థం చేసుకోవాలని గతంలో పాక్​ మీడియాకు ఇచ్చిన ముఖాముఖిలో స్పష్టం చేశారు బుష్రా.

ఇదీ చూడండి:- శిథిల నగరానికి పూర్వ వైభవం ఎప్పటికో....!