Israel Florona disease: కరోనా ఒమిక్రాన్ వేరియంట్ ప్రపంచ దేశాలను వణికిస్తున్న వేళ... ఇజ్రాయెల్లో ఫ్లొరోనా వ్యాధి కలకలం రేపుతోంది. ఆ దేశంలో తొలి ఫ్లొరోనా కేసు వెలుగు చూసింది. ఈ విషయాన్ని అరబ్ న్యూస్ వార్తా సంస్థ ట్విట్టర్ వేదికగా గురువారం వెల్లడించింది.
ఫ్లొరోనా అంటే...?
ఫ్లొరోనా అంటే కొవిడ్-19, ఇన్ఫ్లూయెంజా డబుల్ ఇన్ఫెక్షన్ అని అర్థం. ఇజ్రాయెల్లో ఈ తరహా కేసు వెలుగు చూడగా.. ఆ దేశ ప్రభుత్వం అప్రమత్తమైంది. వ్యాధి వ్యాప్తి కట్టడికి చర్యలు చేపట్టింది.
మరోవైపు.. ఇజ్రాయెల్లో కరోనా టీకా నాలుగో డోసును అందించే ప్రక్రియ ప్రారంభించారు.
Israel vaccination: 'ఒమిక్రాన్' వేగంగా విస్తరిస్తున్న నేపథ్యంలో.. కొవిడ్ టీకా డోసుల ద్వారా అందిన రోగ నిరోధక శక్తి క్షీణించినందున నాలుగో డోసు వేసే ప్రక్రియను తాము ప్రారంభించామని ఇజ్రాయెల్ ఆరోగ్య శాఖ డైరెక్టర్ జనరల్ నాచ్మన్ యాష్ పేర్కొన్నారు. తమ దేశప్రజలకు మూడో డోసు టీకా అందించి నాలుగు నెలలు దాటిందని తెలిపారు.
ఇజ్రాయెల్లో కరోనా వ్యాప్తి కొనసాగుతోంది. ఆ దేశ ఆరోగ్య శాఖ గణాంకాల ప్రకారం కొత్తగా దాదాపు 5,000 కేసులు నమోదయ్యాయి.
ఇదీ చూడండి: అమెరికాలో 'కొవిడ్' ఉప్పెన.. ఒక్కరోజులో 5.6లక్షల కేసులు
ఇదీ చూడండి: ప్రపంచంపై మరోసారి కరోనా పంజా- వారంలోనే 11% పెరిగిన కేసులు
