మయన్మార్లో సైనిక తిరుగబాటుతో నెలకొన్న అనిశ్చితిని అంతం చేసే దిశగా ఆసియాన్ దేశాలు చేపట్టిన చర్యను భారత్ స్వాగతించింది. మయన్మార్లో ప్రస్తుత పరిస్థితిని పరిష్కరించడంలో తాము నిర్మాణాత్మక, అర్థవంతమైన పాత్ర పోషిస్తామని పేర్కొంది. ఈ మేరకు విదేశీ వ్యవహారాల మంత్రిత్వ శాఖ ప్రతినిధి అరిందమ్ బాగ్చి తెలిపారు.
"ఏప్రిల్ 24న జరిగిన ఆసియాన్ శిఖరాగ్ర సమావేశంలో మయన్మార్లో హింసను అంతం పలికే దిశగా ఆసియాన్ దేశాలు చూపిన చొరవను మేము స్వాగతిస్తున్నాము. ఈ ప్రయత్నాలను బలోపేతం చేసేలా.. మయన్మార్తో మేం సంప్రదింపులు జరుపుతాం. మయన్మార్ ప్రజలకు భారత్ ఓ ఆత్మీయ నేస్తం. మయన్మార్లో ప్రస్తుతం నెలకొన్న ఉద్రిక్తతలను రూపుమాపేలా.. నిర్మాణాత్మకమైన, అర్థవంతమైన చర్చలు జరుపుతాం. "
-అరిందమ్ బాగ్చి, విదేశాంగ శాఖ ప్రతినిధి
మయన్మార్లో హింసను అంతం చేయటం సహా ఐదు అంశాలపై ఏకాభిప్రాయాన్ని ఆసియాన్ దేశాలు శనివారం విడుదల చేశాయి.
700 మంది మృతి!
ఫిబ్రవరి 1న తిరుగుబాటు చేసి ప్రజాస్వామ్యయుతంగా ఎన్నికైన ప్రభుత్వాన్ని కూలదోసింది మయన్మార్ సైన్యం. ఈ తిరుగుబాటుకు వ్యతిరేకంగా పెద్ద ఎత్తున నిరసనలు జరుగుతున్నాయి. వీటిని అణచివేసేందుకు సైన్యం కఠిన చర్యలు చేపడుతోంది. సొంత పౌరులపైనే కాల్పులకు తెగబడుతోంది. ఇప్పటివరకు భద్రతా దళాల కాల్పుల్లో 700 మంది నిరసనకారులు చనిపోయినట్లు అంచనా.
ఇదీ చూడండి: కొవిడ్ ఆస్పత్రిలో ప్రమాదం- 82 మంది మృతి
