అమెరికా సహా ప్రపంచదేశాల నమ్మకాన్ని సంపాదించిన భారత్.. చైనాను పెక్కకునెట్టి గ్లోబల్ వాణిజ్య శక్తిగా ఎదగగలదని యూఎస్ విదేశాంగమంత్రి మైక్ పాంపియో అభిప్రాయపడ్డారు. ఫలితంగా ప్రపంచదేశాలు చైనా కంపెనీలపై ఆధారపడడం తగ్గుతుందని ఆయన పేర్కొన్నారు.
యూఎస్ ఇండియా బిజినెస్ కౌన్సిల్ వార్షిక ఇండియా ఐడియా సమ్మిట్లో పాంపియో మాట్లాడుతూ ఈ కీలక వ్యాఖ్యలు చేశారు.
"చైనాను పక్కకునెట్టి ప్రపంచ వాణిజ్యాన్ని ఆకర్షించే సత్తా భారత్కు ఉంది. ముఖ్యంగా టెలికమ్యునికేషన్, వైద్య సామగ్రి సహా పలు రంగాల్లో... ప్రపంచ అవసరాలను తీర్చే సామర్థ్యం భారత్కు ఉంది. ఇది కచ్చితంగా ప్రపంచ దేశాలు చైనాపై ఆధారపడడాన్ని తగ్గిస్తుంది."
- మైక్ పాంపియో, అమెరికా విదేశాంగమంత్రి
భారత్-అమెరికా వాణిజ్య బంధం
అదే సమయంలో భారత్ తన మార్కెట్ను ప్రపంచ పెట్టుబడులకు అనుకూలంగా సంస్కరించాల్సిన అవసరముందని పాంపియో నొక్కి చెప్పారు. ముఖ్యంగా అమెరికా సంస్థలు భారత్లో పెద్ద ఎత్తున పెట్టుబడులు పెట్టేందుకు, వాణిజ్యం చేసేందుకు అవకాశం కల్పించాలని సూచించారు.
ఈ సందర్భంగా అమెరికా ఆతిథ్యం ఇవ్వనున్న తదుపరి జీ-7 శిఖరాగ్ర సదస్సుకు భారత ప్రధాని నరేంద్రమోదీని ఆహ్వానించిన విషయాన్ని మైక్ పాంపియో గుర్తుచేశారు. ఏది ఏమైనా భారత్-అమెరికా భాగస్వామ్యం మరింత బలపడుతుందనే నమ్మకముందని ఆయన పేర్కొన్నారు.
కలిసి పనిచేద్దాం..
చైనా కమ్యూనిస్టు పార్టీ నుంచి సవాళ్లు ఎదురవుతున్న వేళ... భారత్-అమెరికా లాంటి ప్రజాస్వామ్య దేశాలు కలిసి పనిచేయాల్సిన అవసరం ఉందని పాంపియో అభిప్రాయపడ్డారు.
చైనా మేధో సంపత్తి చౌర్యానికి పాల్పడుతోందని... పాంపియో మరోసారి విమర్శలు గుప్పించారు. ఇలాంటి తరుణంలో మేధో హక్కుల పరిరక్షణకు భారత్-అమెరికాలు కలిసి పనిచేయాలని ఆయన అభిలషించారు.
ఇదీ చూడండి: 'భారత్లో పెట్టబడులకు ఇదే మా అహ్వానం'
