ఉగ్రవాదులపై ఉక్కుపాదం మోపుతామని ప్రకటించారు పాకిస్థాన్ ప్రధానమంత్రి ఇమ్రాన్ ఖాన్. ప్రధానిగా బాధ్యతలు చేపట్టిన అనంతరం మొట్టమొదటి సారి బహిరంగ సభలో ఆయన పాల్గొన్నారు. మత ప్రాతిపదికన దేశంలో ఉన్న అల్పసంఖ్యాక వర్గాల హక్కులను కాపాడేందుకు కృషి చేస్తామన్నారు ఇమ్రాన్. జాతిపిత మహ్మద్ అలీ జిన్నా సిద్ధాంతాలను అనుసరిస్తూ పరమత సహనాన్ని పాటిస్తామన్నారు.
పుల్వామా ఉగ్రదాడి అనంతరం అంతర్జాతీయంగా వస్తోన్న ఒత్తిళ్ల మేరకు ఈ ప్రకటన చేసినట్లుగా తెలుస్తోంది. ముంబై దాడుల సూత్రధారి హఫీజ్ సయీద్ నేతృత్వంలోని 'జమాత్ ఉద్ దవా' సంస్థ లాహోర్ కార్యాలయాన్ని, ఆ సంస్థ ఛారిటీ విభాగం 'ఫలాహ్ ఏ ఇన్సానియత్'ను పాక్ ప్రభుత్వం మూసివేసింది. 120 మంది అనుమానిత ఉగ్రవాదుల్ని అదుపులోకి తీసుకుంది.
ఆర్థిక సహాయం ఎక్కడినుంచి?
ఇటీవల నిషేధం విధించిన పాక్ ఉగ్రవాద సంస్థ జైషే మహ్మద్ను అత్యంత ప్రమాదకర సంస్థల జాబితాలో పెట్టింది పాక్. 'ఆర్థిక వ్యవహారాల పర్యవేక్షణ కార్యదళం' (ఎఫ్ఏటీఎఫ్) ప్రస్తావించిన ఉగ్రసంస్థల లావాదేవీలను పునఃపరిశీలించనుంది పాక్ ప్రభుత్వం. ఫ్రాన్స్ వేదికగా కార్యకలాపాలు నిర్వహించే ఈ సంస్థ ఇప్పటికే పలు అంతర్జాతీయ ఉగ్రవాద సంస్థలను ప్రమాదకర జాబితాలో చేర్చింది. వీటి కార్యకలాపాలను ఎప్పటికప్పడు అత్యంత జాగ్రత్తగా పరిశీలిస్తోంది ఈ సంస్థ.
