కశ్మీర్లో పవిత్ర యుద్ధం (జీహాద్) చేయడానికి పాకిస్థానీలెవరూ వెళ్లవద్దని ఆ దేశ ప్రధాని ఇమ్రాన్ఖాన్ కోరారు. ఇలా చేస్తే కశ్మీర్ విషయంలో పాక్ చేస్తున్న పోరాటానికి తీవ్ర విఘాతం కలుగుతుందని పేర్కొన్నారు. పాక్-అఫ్గాన్ సరిహద్దులో నిర్మించిన తోర్ఖం టెర్మినల్ ప్రారంభోత్సవం సందర్భంగా ఆయన ఈ వ్యాఖ్యలు చేశారు ఇమ్రాన్.
"పాకిస్థాన్ నుంచి పవిత్ర యుద్ధం (జీహాద్) చేయడానికి ఎవరైనా భారతదేశానికి వెళితే.. కశ్మీరీలకు అన్యాయం చేసిన మొదటి వ్యక్తి మీరే అవుతారు. కశ్మీరీలకు శత్రువులవుతారు."- ఇమ్రాన్ఖాన్, పాకిస్థాన్ ప్రధాన మంత్రి
కశ్మీరీలను అణచివేసేందుకు భారత్ ఓ కారణం వెదుకుతోందని ఇమ్రాన్ అన్నారు. కశ్మీర్ నుంచి అందరి దృష్టిని మళ్లించేందుకు భారత్ ఓ తప్పుడు ఆపరేషన్ ప్రారంభించవచ్చని ఆయన పదేపదే చెబుతున్నారు.
ట్రంప్తో సమాలోచనలు..
వచ్చే వారం కశ్మీర్ సమస్యను ఐక్యరాజ్యసమితి సాధారణ సభలో ప్రస్తావించడానికి ఇమ్రాన్ సిద్ధమవుతున్నారు. పనిలోపనిగా అమెరికా అధ్యక్షుడు డొనాల్డ్ ట్రంప్తోనూ ఈ విషయమై చర్చించాలని నిర్ణయించారు.
"ఐరాస సాధారణ సభలో మునుపెన్నడూ లేని విధంగా కశ్మీర్ సమస్యను బలంగా వినిపిస్తాం."- ఇమ్రాన్ఖాన్, పాక్ ప్రధాని
చర్చల్లేవ్...
ఆర్టికల్ 370 పునరుద్ధరణతో పాటు కశ్మీర్లో ఆంక్షలు ఎత్తివేసేంత వరకు భారత్లో పాక్ శాంతిచర్చలు జరిపే ప్రసక్తే లేదని ఇమ్రాన్ ప్రకటించారు. కొందరు రాజకీయ, మతాధికార పార్టీలతో కలిసి నియంత్రణరేఖ వెంబడి మార్చ్ చేయాలని ఇమ్రాన్ తొలుత భావించారు. అయితే ఐరాసలో సెప్టెంబర్ 27న కశ్మీర్ అంశాన్ని చర్చించేవరకు ఈ కవాతు వాయిదా వేయాలని నిర్ణయించారు.
ఆర్టికల్ 370 రద్దుతో
భారత్ కశ్మీర్కు ప్రత్యేక ప్రతిపత్తిని ఇచ్చే ఆర్టికల్ 370ని రద్దు చేసింది. దీనిపై పాక్ అభ్యంతరం వ్యక్తం చేస్తూ అంతర్జాతీయ వేదికలను ఆశ్రయిస్తోంది. అయితే కశ్మీర్.. తమ అంతర్గత విషయమని భారత్ తేల్చిచెప్పింది. దీనితో ఇరుదేశాల మధ్య ఉద్రిక్తతలు కొనసాగుతున్నాయి.
ఇదీ చూడండి: ప్రధాని మోదీ విమానానికి అనుమతినివ్వని పాక్
