ఆసియా భవిష్యత్తును భారత్-చైనాల భాగస్వామ్యమే నిర్ణయిస్తుందని చెప్పారు నేపాల్ విదేశాంగ మంత్రి ప్రదీప్ గ్యవాలి. వుహాన్ సమావేశం అనంతరం రెండు దేశాల మధ్య బంధం మరింత బలపడిందని, కానీ గల్వాన్ లోయ ఘర్షణ అనంతరం పరిస్థితి పూర్తిగా మారిపోయిందన్నారు.
'ఫారెన్ పాలసీ ఆఫ్ నేపాల్ ఇన్ చేంజింగ్ జియోపొలిటికల్ కాంటెక్స్ట్' వెబినార్లో ప్రసంగించారు ప్రదీప్. భారత్-చైనాలు చర్చల ద్వారా సమస్యను పరిష్కరించుకుంటాయని ఆశాభావం వ్యక్తం చేశారు. కానీ అది కఠినమైన సవాలు అని పేర్కొన్నారు.
మ్యాప్పై అభ్యంతరం..
భారత్ గతేడాది నవంబరులో విడుదల చేసిన 8వ ఎడిషన్ మ్యాప్లో కాలాపానీ, లిపులేఖ్, లింపియాధురా ప్రాంతాలు ఉన్నాయని, అవి నేపాల్ భూభాగాలని ప్రదీప్ అన్నారు. ఈ విషయాన్ని తాము రాజకీయ ప్రకటన ద్వారా వ్యతిరేకించామని గుర్తు చేశారు. సమస్యను పరిష్కరించుకునేందుకు దౌత్యపరమైన చర్చల కోసం తాము ప్రతిపాదనలు చేస్తే భారత్ నుంచి సరైన స్పందన లేదని చెప్పారు.
