హాంకాంగ్లో 13వారాలుగా ప్రభుత్వానికి వ్యతిరేకంగా సాగుతున్న నిరసనలు రోజురోజుకూ యుద్ధ వాతావరణాన్ని తలపిస్తున్నాయి. తాజాగా ఆదివారం ఉదయం విమానాశ్రయాలకు వెళ్లే మార్గాలను నిరసనకారులు నిర్బంధించారు. దీంతో విమానాశ్రయానికి వెళ్లే ఎక్స్ప్రెస్ రైళ్లను నిలిపేశారు.
విమానాశ్రయం దగ్గర్లోని బస్ స్టేషన్ వద్ద బారికేడ్లను ఏర్పాటు చేశారు. ఇప్పటి వరకు విమానాల రాకపోకలకు ఎలాంటి అంతరాయం కలగలేదు. అల్లర్లు సృష్టిస్తున్న నిరసనకారులను పోలీసులు చుట్టుముట్టారు.
విమానాశ్రయం సమీపంలో ప్రదర్శనలను నిషేధించినప్పటికీ.. నిరసనకారులు యథాతథంగానే అదంతా పట్టించుకోలేదు. ఇంతకుముందెన్నడూ లేని హింసాత్మక ఘటనలతో ఆగస్టు నెల ముగిసింది.
పార్లమెంటు ముట్టడి
అర్ధరాత్రి సమయంలో జరిగిన ప్రదర్శనల్లో మునుపెన్నడూ లేనంత హింసాత్మక చర్యలు జరిగాయి. నగరంలోని పార్లమెంటు భవనాన్ని ముట్టడించిన నిరసనకారులపైకి పాలీసులు బాష్పవాయువు, రబ్బర్ బుల్లెట్లను, జల ఫిరంగులను ప్రయోగించారు.
ఆగ్రహించిన ఆందోళనకారులు వారిపై పెట్రోల్ బాంబులను విసిరారు. పోలీసులు దొరికిన వారిని దొరికినట్లే అరెస్ట్ చేశారు.
నాయకుల అరెస్ట్
భద్రతా కారణాల దృష్ట్యా శుక్రవారం హాంకాంగ్ పోలీసులు నిరసనలకు మద్దతిస్తున్న నాయకులను అదుపులోకి తీసుకున్నారు. ఇప్పటికి 13 వారాల వ్యవధిలో జూన్ నుంచి దాదాపు 900 మంది నిరసనకారులను పోలీసులు అరెస్ట్ చేశారు.
చైనా వెనక్కి తగ్గనుందా?
హాంకాంగ్లో నెలకొన్న పరిస్థితులు తీవ్ర ఆందోళనకు గురిచేస్తున్నాయని ఐరోపా సమాఖ్య రాయబారి వ్యాఖ్యానించారు. చైనాపై ప్రస్తుతం ఉన్న ఆర్థిక ఒత్తిడే హాంకాంగ్పై సరైన నిర్ణయం తీసుకునేలా చేస్తుందని అమెరికా ప్రెసిడెంట్ డొనాల్డ్ ట్రంప్ అన్నారు.
నిరసనకారుల డిమాండ్లు ఇవే
ప్రజాస్వామ్య వ్యవస్థలో సంస్కరణలు, చైనా బిల్లు రద్దు, సార్వత్రిక ఎన్నికలు, ప్రస్తుత రాజ్యాంగ రద్దు, పోలీసుల అరాచకాలపై విచారణ చేపట్టాలని ఆందోళనలు చేస్తున్నారు హాంకాంగ్ ప్రజలు.
ఇదీ చూడండి:భారత్తో ద్వైపాక్షిక చర్చలకు సిద్ధం: ఖురేషీ
