నూతన చట్టానికి వ్యతిరేకంగా హాంకాంగ్లో బుధవారం పెద్ద ఎత్తున నిరసనలు చెలరేగాయి. ఇందులో భాగంగా.. ఓ పోలీసు అధికారిపై కత్తితో దాడిచేసినట్లు అనుమానిస్తున్న వ్యక్తిని అరెస్ట్ చేశారు అధికారులు. గురువారం ఉదయం లండన్ బయలుదేరుతున్న విమానంలో అతడిని అదుపులోకి తీసుకున్నట్లు తెలిపారు.
లండన్ వెళ్లే కాథే పెసిఫిక్ విమానంలో "వాంగ్" అనే ఇంటిపేరుతో ఉన్న 24ఏళ్ల యువకుడిని అరెస్ట్ చేసినట్లు ఓ అధికారి వెల్లడించారు. వాంగ్.. లండన్ వెళ్లేందుకు బుధవారం టికెట్ కొనుగోలు చేశాడని.. గురువారం ఎలాంటి తనిఖీ లేకుండానే విమానం ఎక్కాడని తెలిపారు. విమానం సిబ్బంది అతడిని పేరు పెట్టి పిలిచినా పలకకపోవటం, అతని సీట్లో కూర్చోకపోవడం వల్ల అనుమానం వచ్చి పోలీసులకు సమాచారమిచ్చారని, అనంతరం అతడిని అరెస్ట్ చేసినట్లు చెప్పారు.
అయితే.. అతని బంధువు ఒకరు పోలీసులకు సమాచారం ఇచ్చిన క్రమంలో అరెస్ట్ చేసినట్లు స్థానిక మీడియాలో వార్తలు రావడం గమనార్హం.
370 మంది అరెస్ట్..
హాంకాంగ్లో జాతీయ భద్రతా చట్టం గత మంగళవారం అమలులోకి వచ్చింది. ఇందులో భాగంగా.. చైనా, హాంకాంగ్ ప్రభుత్వాలను వ్యతిరేకించడాన్ని నేరంగా పరిగణిస్తారు. ఈ క్రమంలో కొత్త చట్టంపై ఆందోళనలు చెలరేగాయి. మూడురోజుల్లో సుమారు 370 మందిని అరెస్ట్ చేశారు పోలీసులు.
