ముంబయి దాడుల సూత్రధారి, ఉగ్రవాద సంస్థ జమాత్-ఉద్-దావా (జేయూడీ) అధినేత హఫీజ్ సయీద్కు పవిత్ర 'ఈద్ ఉల్ ఫితర్' సందర్భంగా పాకిస్థాన్ ప్రభుత్వం షాకిచ్చింది. పాకిస్థాన్ పంజాబ్లోని ఖడాఫీ మైదానంలో జరిగిన పవిత్ర ఈద్ ప్రార్థనలకు సారథిగా ఉండేందుకు ఆయనకు అనుమతి నిరాకరించింది.
ఇందుకు బదులుగా స్థానిక మసీదుల్లో నిర్వహించే ప్రార్థనలకు సారథిగా వ్యవహరించేందుకు సయీద్కు అనుమతినిచ్చినట్లు పాక్ అధికార ప్రతినిధి తెలిపారు.
"జేయూడీ ఉగ్రసంస్థ అధినేత మొదట ఖడాఫీ మైదానంలో ఈద్ ప్రార్థనలు చేయించాలని భావించాడు. అయితే ఈద్కు ఒక రోజు ముందు అతను ప్రార్థనలకు సారథిగా వ్యవహరించకూడదని ప్రభుత్వం నిర్ణయం ప్రకటించింది. ఒక వేళ సయీద్ ముందుగా అనుకున్నట్లుగానే ప్రార్థనలకు సారథిగా ఉంటే.. ప్రభుత్వం అతణ్ని అరెస్టు చేసి ఉండేది." - పాక్ అధికారి
ప్రభుత్వ ఆదేశాలను పాటించడం తప్ప సయీద్కు వేరే ప్రత్యామ్నాయం లేదు. ఖడాఫీ మైదానంలో ప్రార్థనలు ఆపేందుకు కూడా అవకాశం లేదని అధికారి తెలిపారు.
కొన్నేళ్లుగా ఖడాఫీ మైదానంలో జరిగే ఈద్ ఉల్ ఫితర్, ఈద్ ఉల్ అజా ప్రార్థనలకు సారథిగా సయీద్ వ్యవహరిస్తున్నాడు. ఈ ప్రార్థనలకు ప్రభుత్వం కూడా గట్టి భద్రతను కల్పించేది. అయితే గతంలో ప్రార్థనలకు సారథ్యం వహించడమే కాకుండా.. అక్కడికి వచ్చిన వేలాదిమంది ప్రజల ముందు కశ్మీర్పై తన కార్యచరణను చెప్పేవాడు సయీద్.
సయీద్ను నిషేదించిన ఐరాస
ముంబయి ఉగ్రదాడులకు సుత్రధారిగా వ్యవహరించి.. 166 మంది మరణానికి కారణమైన సయీద్పై ఐక్యరాజ్య సమితి 2008 డిసెంబర్ 10న నిషేధం విధించింది.
ఇదీ చూడండి: 'ప్రపంచవ్యాప్తంగా ప్రమాదంలో పత్రికా స్వేచ్ఛ'
