తిరుగుబాటుదారుల నియంత్రణలోని ప్రాంతంలో ఉన్న ఓ ఆసుపత్రిపై బాంబుల వర్షం కురిపించాయి ప్రభుత్వ బలగాలు. ఈ దాడిలో ఓ చిన్నారి సహా మొత్తం ఆరుగురు ప్రాణాలు కోల్పోయారు. మరో 17 మంది తీవ్రంగా గాయప్డాడరు. వారిలో వైద్యసిబ్బంది కూడా ఉన్నారు. ఈ దాడితో ఆసుపత్రిని మూసివేశారు.
భారీ నష్టం..
పశ్చిమ అలెప్పోలోని అటారెబ్ పట్టణ సమీప ప్రాంతంతో పాటు ఆసుపత్రి ప్రాంగణంపై దాడులు జరిగినట్టు బ్రిటన్ ఆధారిత సిరియా మానవ హక్కుల పరిశీలనా విభాగం తెలిపింది. ప్రభుత్వం, దాని అనుబంధ (రష్యాతో పాటు) బలగాలే ఈ దాడులు చేసినట్లు ఆరోపించారు. భూగర్భంలోని సిరియన్ అమెరికన్ మెడికల్ సొసైటీపై మూడు క్షిపణులు పడగా.. ఆసుపత్రిలోని ఆర్థోపెడిక్ క్లినిక్ కూలిపోయింది. పైకప్పు మీదున్న జనరేటర్లు ధ్వంసమయ్యాయి. తీవ్ర ఆస్తినష్టం వాటిల్లినట్టు అక్కడి సిబ్బంది తెలిపారు.
దాడుల నేపత్యంలో ఆసుపత్రిని ఖాళీ చేయించారు. గాయపడిన వారిలో నలుగురిని అత్యవసర చికిత్స నిమిత్తం టర్కీకి తరలించినట్టు అక్కడి మీడియా వెల్లడించింది.
సిరియా ఆసుపత్రులపై దాడులు జరగడం ఇది కొత్తేమీ కాదు. ఈ ఏడాది ఇది ఐదవది కాగా.. 2011 నుంచి ఇప్పటివరకు 350 ఆసుత్రులపై 598సార్లు దాడులు జరిగినట్టు అమెరికాకు చెందిన ఓ నివేదిక పేర్కొంది. ఈ దాడుల కారణంగా.. పదేళ్ల కాలంలో మొత్తం 930 మంది చనిపోయారని వివరించింది.
ఈ ప్రాంతం ఉగ్రవాదుల నియంత్రణలో ఉన్నట్లు.. అక్కడి ప్రభుత్వం భావిస్తోంది. ఈ క్రమంలోనే బాంబుల వర్షం కురిపిస్తున్నట్లు తెలుస్తోంది.
ప్రతిదాడి..
ఈ ఘటనకు వ్యతిరేకంగా.. తిరుగుబాటుదారులు కూడా అలెప్పో నగరంలోని ప్రభుత్వ ప్రాంతాలపై ప్రతిదాడికి దిగి.. ఇద్దరు పౌరులను హతమార్చినట్టు స్థానిక వార్తా సంస్థ వెల్లడించింది.
ఇదీ చదవండి: సిరియాలో పేలుడు- ఇద్దరు మృతి
