ప్రపంచ వ్యాప్తంగా కరోనా వైరస్ ఉగ్రరూపం దాల్చుతోంది. రోజుకు వందల మరణాలు సంభవిస్తూనే ఉన్నాయి. ఇప్పటివరకూ వివిధ దేశాల్లో 17,235 మంది మరణించగా... 3,95,807 మందికి ఈ వైరస్ సోకింది. దాదాపు ప్రపంచంలోని అన్ని దేశాలకు ఈ మహమ్మారి విస్తరించినట్లు తెలుస్తోంది.
చైనాలో మరో 78 కొత్త కేసులు గుర్తించినట్లు అక్కడి అధికారులు తెలిపారు. ఏడుగురు మరణించినట్లు వెల్లడించారు.
భౌగోళిక ప్రాంతాల వారీగా...
| ఖండం/దేశం/ప్రాంతం | కేసులు | మరణాలు |
| ఐరోపా | 1,99,779 | 10,724 |
| ఆసియా | 98,748 | 3,570 |
| అమెరికా, కెనడా | 48,519 | 523 |
| పశ్చిమాసియా | 29,087 | 1,966 |
| లాటిన్ అమెరికా, కరీబియన్ | 6,217 | 112 |
| ఆఫ్రికా | 1,788 | 58 |
514మంది
స్పెయిన్లో కరోనా మహమ్మారి మరో 514 మందిని పొట్టనబెట్టుకుంది. దీంతో ఆ దేశంలో మరణాల సంఖ్య 2,696కి చేరింది.
నిన్నటితో పోలిస్తే కరోనా కేసుల సంఖ్య 20శాతం పెరిగి 39,673కు చేరినట్లు అక్కడి ఆరోగ్య శాఖ ప్రకటించింది.
ఫ్రాన్స్లో మొత్తం 860 మరణాలు సంభవించగా... 19,856 కేసులు నమోదయ్యాయి. అమెరికాలో 499 మంది కరోనాకు బలయ్యారు. మొత్తం 46,440 మందికి కొవిడ్ సోకింది.
ఇరాన్
వైరస్ ప్రభావం అధికంగా ఉన్న దేశాల్లో ఇరాన్ ఒకటి. తాజాగా దేశంలో మరో 122 మంది కరోనాతో మరణించారు. దీంతో మృతుల సంఖ్య 1,934కి చేరినట్లు అధికారులు వెల్లడించారు.
గత 24 గంటల్లో 1,762 కొత్త కేసులు నమోదైనట్లు ఆ దేశ ఆరోగ్య శాఖ ప్రకటించింది. దేశంలో మొత్తం 24,811 మంది ఈ వైరస్ బారిన పడ్డారని పేర్కొంది.
పాక్లో 903కి చేరిన కేసులు
పాకిస్థాన్లో కరోనా వైరస్ విజృంభిస్తోంది. పంజాబ్ రాష్ట్రంలో ఈ మహమ్మారికి ఓ వ్యక్తి బలయ్యారు. ఇప్పటివరకు పాక్లో ఏడుగురు కరోనా కారణంగా మరణించారు. దేశంలో వైరస్ కేసుల సంఖ్య 903కు చేరినట్లు ప్రభుత్వం స్పష్టం చేసింది. ఈ నేపథ్యంలో పలు చర్యలకు ఉపక్రమించింది ఇమ్రాన్ ప్రభుత్వం. మార్చి 31 వరకు ప్యాసింజర్ రైళ్లను రద్దు చేసింది.
తొలి కేసులు, మరణాలు
మయన్మార్లో తొలి వైరస్ కేసు నమోదైంది. 214 మందికి కరోనా పరీక్షలు నిర్వహించారు అధికారులు. ఇందులో అమెరికా నుంచి తిరిగి వచ్చిన 36 ఏళ్ల వ్యక్తికి, బ్రిటన్ నుంచి తిరిగివచ్చిన 26 ఏళ్ల వ్యక్తికి కరోనా పాజిటివ్గా తేలిందని ఆరోగ్య శాఖ ధ్రువీకరించింది.
ఐస్లాండ్లో తొలి కరోనా మరణం సంభవించింది. వైరస్తో వృద్ధురాలు మరణించినట్లు అధికారులు తెలిపారు.
ఆఫ్రికాలో ఇలా
దక్షిణాఫ్రికాలో కరోనా కేసుల సంఖ్య మళ్లీ పెరిగింది. దేశవ్యాప్తంగా 554 కేసులు నమోదైనట్లు అధికారులు స్పష్టం చేశారు. 21 రోజుల పాటు దేశంలో లాక్డౌన్ కొనసాగనుంది.
ఆఫ్రికా ఖండంలోని 54 దేశాల్లో 43 దేశాలకు ఈ వైరస్ పాకింది. ఆయా దేశాల్లో మొత్తం 1,788 మందికి కరోనా సోకగా... 58 మంది మరణించారు. ఈ నేపథ్యంలో పలు దేశాలు కట్టడి చర్యలు ముమ్మరం చేస్తున్నాయి. అంతర్జాతీయ విమానాలను రద్దు చేస్తూ నైజీరియా నిర్ణయం తీసుకుంది. ఆర్థిక సహకారం చేయాలని ఇథియోపియా జీ20 గ్లోబల్ ఫోరంకు అభ్యర్థించింది. 150 బిలియన్ డాలర్ల అత్యవసర ప్యాకేజీ ఆఫ్రికాకు ప్రకటించాలని ప్రతిపాదించింది.
