లాక్​డౌన్​ ముగింపునకు ముందు మళ్లీ కరోనా ఉద్ధృతి

ప్రపంచవ్యాప్తంగా కరోనా కేసులు, మృతుల సంఖ్య రోజురోజుకు పెరుగుతున్నాయి. సింగపూర్​లోని విదేశీ కార్మికులు భారీ సంఖ్యలో వైరస్​ బారినపడ్డారు. స్పెయిన్​లో ఆర్థిక వ్యవస్థ పునరుద్ధరణవైపు ప్రభుత్వం అడుగులు వేస్తున్న తరుణంలో.. రోజువారీ మరణాల సంఖ్య పెరగడం తీవ్ర ఆందోళనకు గురిచేస్తోంది.

ప్రపంచవ్యాప్తంగా కరోనా వ్యాప్తి కొనసాగుతోంది. ఇప్పటివరకు 31లక్షల 60వేల 779మందికి వైరస్​ సోకింది. మొత్తం 2లక్షల 19వేల 258మంది ప్రాణాలు కోల్పోయారు.

దేశం	కేసులు	మృతులు
అమెరికా	10,35,765	59,266
స్పెయిన్​	2,36,899	24,275
ఇటలీ	2,01,505	27,359
ఫ్రాన్స్​	1,65,911	23,660
బ్రిటన్​	1,61,145	21,678
జర్మనీ	1,60,059	6,314
రష్యా	99,399	972
ఇరాన్​	93,657	5,957
చైనా	82,858	4,633

స్పెయిన్​లో మళ్లీ...

స్పెయిల్​లో రోజువారీ మరణాల సంఖ్య మళ్లీ పెరిగింది. తాజాగా 325మంది వైరస్​ సోకి ప్రాణాలు కోల్పోయారు. దీంతో ఆ దేశంలో మృతుల సంఖ్య 24వేల 275కు చేరింది.

అయితే స్పెయిన్​లో డీలా పడ్డ ఆర్థిక వ్యవస్థను గాడిపెట్టేందుకు ప్రభుత్వ యంత్రాంగం ప్రణాళికలు రచిస్తోంది. ఈ శనివారం నుంచి వ్యక్తిగత కార్యకలాపాలు ప్రారంభమవుతాయి. అపాయింట్​మెంట్​ ఉన్న వారే క్షవరం​ వంటి పనుల కోసం ఇంటి నుంచి బయటకు రావాల్సి ఉంటుంది. మే 11 తర్వాతే ఇతర దుకాణాలు తెరుచుకుంటాయి. సామాజిక దూరం వంటి నిబంధనలతో కేఫ్​లు, బార్లు పనిచేస్తాయి. మూడింట ఒకవంతు వారికే చర్చిలు, మసీదుల్లో ప్రార్థనలకు అనుమతినిస్తారు.

సింగపూర్​లో ఆందోళనకరంగా...

సింగపూర్​లో పరిస్థితులు కొంతమేర ఆందోళనకరంగా ఉన్నాయి. కేసుల సంఖ్య రోజురోజుకు పెరుగుతోంది. వీరిలో చాలామంది విదేశీ కార్మికులే ఉండటం గమనార్హం. తాజాగా మరో 690 కేసులు నమోదయ్యాయి. వీరిలో కేవలం ఆరుగురు సింగపూర్​ వాసులు ఉన్నారు. మొత్తం కేసుల సంఖ్య 15వేల 641కి చేరింది. వీరిలో 12,183మంది విదేశీ కార్మికులే.

పాకిస్థాన్​లోనూ...

పాకిస్థాన్​లో ఇప్పటివరకు 14వేల 885మంది వైరస్​ బారినపడ్డారు. మృతుల సంఖ్య 327కు చేరింది. 3,425మంది కోలుకోగా.. 129మంది పరిస్థితి అత్యంత విషమంగా ఉంది.

మంగళవారం ఒక్కరోజే వేల 530మందికి కరోనా పరీక్షలు నిర్వహించారు. ఇప్పటివరకు దేశవ్యాప్తంగా 1,65,911మందికి పరీక్షలు చేశారు.

అయితే రాజకీయ నేతలు కూడా వైరస్​ బారినపడటం పాక్​లో తీవ్ర కలకలం రేపుతోంది. తాజాగా సింధ్​ రాష్ట్రం అసెంబ్లీలోని ముఖ్య నేత రాణా హమీర్​కు వైరస్​ సోకినట్టు నిర్ధరణ అయ్యింది.