వరిసాగులో తనదైన ముద్ర వేస్తున్న చైనా.. సరికొత్త వంగాడాలను ఆవిష్కరించింది. ఇప్పటికే ప్రపంచంలో అత్యధికంగా వరిని ఉత్పత్తి చేస్తుండగా.. ప్రస్తుతం రెండు మీటర్ల పొడవైన వరి మొక్కలను సాగును ప్రారంభించింది. ఈ వంగడాలతో ఎకరా స్థలంలో రెట్టింపు ధాన్యాన్ని పండించవచ్చని చెబుతోంది. ఈ మేరకు నైరుతి చైనాలోని చాంగ్‌కింగ్లో ఓ హెక్టార్ విస్తీర్ణంలో ప్రయోగాత్మక సాగు చేపట్టింది. ప్రస్తుతానికి ఈ వంగడం అభివృద్ధి దశలో ఉందని.. ఆమోదం లభించగానే పెద్ద ఎత్తున ఉత్పత్తి ప్రారంభమవుతుందని చెబుతున్నారు శాస్త్రవేత్తలు.
ఈ వరి రకంతో ఎకరం కంటే తక్కువ విస్తీర్ణంలోనే 800 కేజీల దిగుబడి వస్తుందని అంచనా వేస్తున్నారు. మొక్కలు పైకి ఎదుగుతాయి కాబట్టి.. పొలాల్లో చేపలను సైతం పెంచుకోవచ్చని సూచిస్తున్నారు శాస్త్రవేత్తలు. ఈ కొత్త రకంతో రైతుల ముఖాల్లో చిరునవ్వు వెల్లివిరుస్తుందంటున్నారు.
ప్రపంచంలోనే అతిపెద్ద వరి ఉత్పత్తిదారుగా ఉంది చైనా. ఆసియాలోనే అత్యధికంగా హెక్టారుకు 6.5-12 టన్నుల వరకు దిగుబడి సాధిస్తోంది. దాదాపు '49 సూపర్ రైస్' రకాలను అభివృద్ధి చేసింది. వీటిలో గోల్డెన్ షటిల్-1, జోంగ్యూ-1, 4, 6 వంటివి ముఖ్యమైనవి. అంతర్జాతీయ వరి పరిశోధన సంస్థ(IRRI), చైనీస్ అకాడెమిక్ ఆఫ్ అగ్రికల్చరల్ సైన్సెస్ (CAAS) సహకారంతో మరిన్ని పరిశోధనలు చేపట్టనున్నట్లు తెలిపారు శాస్త్రవేత్తలు.
ఇదీ చదవండి:
