జమ్ముకశ్మీర్కు స్వయం ప్రతిపత్తిని తొలిగించిన నాటి నుంచి దాదాపు 60మంది ఉగ్రవాదులు.. నిర్మానుష ప్రదేశాల ద్వారా దేశంలోకి అక్రమంగా చొరబడినట్లు అధికారులు తెలిపారు. ఇందుకు పాక్ సైన్యం.. ఉగ్రవాదులకు సహాయం చేసినట్టు వెల్లడించారు.
ఉత్తర కశ్మీర్, పూంచ్, రాజౌరీ ప్రాంతాల్లో ఉగ్రవాదుల చొరబాటు ఘటనలు భారీగా పెరిగాయని నిఘా వ్యవస్థ సమాచారం అందించిన తరుణంలో.. అధికారులు ఈ విషయాన్ని వెల్లడించడం కలవరపరుస్తోంది. అయితే ఉగ్రవాదుల చొరబాటుపై భారత్ సైన్యం ఇంకా ఎలాంటి ప్రకటన చేయలేదు.
చొరబాటు ఘటనలను నిర్ధారించేందుకు ఇటీవలే ఓ సమావేశం జరిగింది. గురెజ్, మచిల్, గుల్మార్గ్, పూంచ్, రాజౌరీ ప్రాంతాల్లో జరిగిన చొరబాటు ఘటనలకు సంబంధించిన ఆధారాలను.. భేటీకి హాజరైన ఓ సైన్యాధికారికి వివిధ భద్రతా సంస్థలు అందించాయి.
నిర్మానుష ప్రాంతాల నుంచి ఉగ్రవాదుల చొరబాటు జరిగిందన్న విషయంపై విచారణ జరపుతున్నట్టు జమ్ముకశ్మీర్ డీజీపీ దిల్బగ్ సింగ్ తెలిపారు.
1990ల్లో కశ్మీర్లోకి చొరబడేందుకు గుల్మార్గ్లోని ఎత్తైన ప్రాంతాలను వినియోగించేవారు ఉగ్రవాదులు. అనంతరం భారత్ సైన్యం అక్కడ నిఘాను పెంచి ఉగ్రవాదుల చొరబాటును నియంత్రించింది. ఈ మార్గాన్నే తాజాగా చొరబాటుకు ఉగ్రవాదులు అనేక మార్లు ఉపయోగించి ఉండవచ్చని అధికారులు అంచనా వేస్తున్నారు. ఎదురుకాల్పుల ముసుగులో ముష్కరులు గురెజ్, మచిల్, తంగ్ధార్ ప్రాంతాల్లోకి ప్రవేశించి ఉండవచ్చన్నారు. గండర్బల్ ప్రాంతంలో కనపడుతున్న కొత్త వారిని దృష్టిలో పెట్టుకుని ఉగ్రవాదుల చొరబాటు జరిగిందని అధికారులు విశ్వసిస్తున్నారు.
