దగ్గు, తుమ్ము, జలుబు.. కరోనా ప్రధాన లక్షణాలు. అయితే వైరస్ సోకిన చిన్నారుల్లో మాత్రం లక్షణాలు తొలుత భిన్నంగా ఉంటున్నాయని తాజాగా ఓ అధ్యయనంలో తేలింది. ఎలాంటి శ్వాస సంబంధిత సమస్యలు లేనప్పటికీ.. విరోచనాలు, జ్వరం వంటి లక్షణాలుంటే పిల్లలకు కరోనా సోకినట్టు అనుమానించాల్సిందేనని పేర్కొంది.
ఫ్రాంటియర్స్ జర్నల్లో ప్రచురితమైన పరిశోధన ప్రకారం.. కరోనా వైరస్ సోకిన తొలినాళ్లలో గ్యాస్ట్రో ఇంటస్టైనల్ లక్షణాలతో చిన్నారులు సతమతమవుతున్నారు. అంటే వారి జీర్ణకోశ వ్యవస్థపై కరోనా వైరస్ తొలుత దాడి చేస్తోందని అర్థమవుతోంది.
వైరస్ రిసెప్టర్లు దాడి చేసే ఊపిరితిత్తుల్లోని కణాలే.. పేగుల్లోను ఉంటాయని పరిశోధకులు తెలిపారు. అందుకే వైరస్ సోకిన పిల్లల్లో విరోచనాలు, జ్వరం వంటి లక్షణాలు తొలుత బయటపడతున్నాయని వివరించారు.
శ్వాస సంబంధిత లక్షణాలు లేనప్పటికీ.. పిల్లలు నిమోనియా, కరోనా వైరస్ బారినపడినట్టు గుర్తించామని పరిశోధకులు తెలిపారు.
మూత్రపిండాల్లో రాళ్లు, తీవ్రమైన తల నొప్పి వంటి సమస్యలకు చికిత్స తీసుకుంటున్న పిల్లలకు కరోనా పరీక్షలు చేయగా.. వారికీ పాజిటివ్గా తేలినట్టు అధ్యయనం సహ రచయిత, చైనా టోంగ్జీ ఆసుపత్రిలోని పీడియాట్రిక్స్ విభాగం సభ్యుడు వెన్బిన్ లీ తెలిపారు. చిన్నారులందరికీ నిమోనియా సోకిందని.. ఆ తర్వాత వైరస్ నిర్ధరణ అయిందని వివరించారు.
ఐదుగురు చిన్నారులపై ఈ పరిశోధనలు జరిపినట్టు లీ తెలిపారు. వీరందరిలోనూ తొలుత ఇదే తరహా లక్షణాలను గుర్తించినట్టు పేర్కొన్నారు. అయితే మరింత కచ్చితత్వం కోసం ఈ అంశంపై మరిన్ని పరిశోధనలు జరపాలని వెల్లడించారు లీ.
