చైనాలో కరోనా వైరస్ బారిన పడుతున్న విదేశీయుల సంఖ్య రోజురోజుకు పెరుగుతోంది. దేశంలో తాజాగా 31 కేసులు నమోదుకాగా.. అందులో 30మంది విదేశీయులే ఉన్నారు. దీని వల్ల వైరస్ సోకిన విదేశీయుల సంఖ్య 723కు చేరింది.
చైనాలో ఇప్పటివరకు మొత్తం 81,470 కేసులు నమోదయ్యాయి. వీరిలో 75వేల 770మంది వైరస్ను జయించారని ఆ దేశ ఆరోగ్యశాఖ వెల్లడించింది.
మరోవైపు మహమ్మారితో తాజాగా నలుగురు ప్రాణాలు కోల్పోయారు. మొత్తం మృతుల సంఖ్య 3వేల 304కు చేరింది.
న్యూయార్క్...
అమెరికాలో కరోనా తీవ్రస్థాయిలో విజృంభిస్తోంది. ముఖ్యంగా న్యూయార్క్ వైరస్ కేంద్రబిందువుగా మారింది. దేశం మొత్తంలో 2 వేల 485 మరణాలు సంభవించగా.. ఒక్క న్యూయార్క్లోనే వెయ్యి మందికిపైగా ప్రాణాలు కోల్పోయారు. దేశవ్యాప్తంగా రికార్డు స్థాయిలో ఒక్కరోజులోనే 965 కేసులు నమోదయ్యాయి.
అయితే.. పరిస్థితులు ఇంకా తీవ్రమవుతాయని అమెరికా అధ్యక్షుడు డొనాల్డ్ ట్రంప్ తెలిపారు. 2 వారాల్లో కరోనా మరణాల రేటు మరితం తీవ్రమవుతుందని అంచనా వేశారు.
ఇతర దేశాల్లో పరిస్థితి ఇలా...
ఇటలీలో...
ఇటలీని కరోనా వైరస్ కోలుకోలేని దెబ్బ తీసింది. ప్రపంచవ్యాప్తంగా ఎక్కడా లేనంతగా ఇటలీలోనే మరణాల సంఖ్య ఎక్కువగా ఉంది. ఇప్పటివరకు 10వేల మందికిపైగా వైరస్ కారణంగా ప్రాణాలు కోల్పోయారు.
దేశవ్యాప్తంగా విధించిన లాక్డౌన్ గడువు ఏప్రిల్ 3తో ముగియనుంది. పరిస్థితులు అదుపులోకి రానందున లాక్డౌన్ను పొడిగించడం అనివార్యమని ఇటలీ ప్రధాని గుసెప్పె కాంటె ప్రకటించారు. ఎన్ని ఆర్థిక సమస్యలు తలెత్తినా.. ప్రజల ప్రాణాలే ముఖ్యమన్నారు.
బ్రెజిల్ అధ్యక్షుడి ట్వీట్ తొలగింపు...
వైరస్ కట్టడిలో క్వారంటైన్ పాత్రను ప్రశ్నిస్తూ బ్రెజిల్ అధ్యక్షుడు బొల్సనారో రెండు ట్వీట్స్ చేశారు. ఆయన వ్యాఖ్యలు సామాజిక మాధ్యమాల నిబంధనలకు విరుద్ధమని పేర్కొంటూ.. ట్విట్టర్ ఆ ట్వీట్లను తొలగించింది.
ఇదీ చూడండి:- కరోనా గురించి మీరు విన్న వాటిలో ఏది నిజం?
